Əminəm ki, Türkiyə Cənubi Qafqazda Azərbaycan vasitəsilə öz təsirini bundan sonra daha da gücləndirəcək ki, bu da təbii olaraq Ermənistanın təhlükəsizlik risklərini artıracaq. Bu sözləri erməni hərbi ekspert Vitali Manqasaryan yerli mediaya açıqlamasında Suriyada türkyönlü qüvvələrin hakimiyyəti ələ keçirməsi ilə regionda güc balansının dəyişməsi və bunun Cənubi Qafqaza təsirləri haqda danışarkən deyib. O bildirib ki, Türkiyə ilə Azərbaycan arasında geosiyasi, iqtisadi və mədəni əlaqələrin güclənməsinə söykənən pantürkizm ideologiyası son illərdə özünü daha çox büruzə verir. Əminəm ki, Suriyada Əsəd rejimi devrildikdən sonra Türkiyənin iştahı artacaq və bütün enerjisini Cənubi Qafqaza, xüsusən də Zəngəzur dəhlizi məsələsinə yönəldəcək. Təsadüfi deyil ki, indiki mərhələdə Azərbaycan Qərbi Azərbaycan İcması mövzusunu irəli sürür və Ermənistandan həmin icmanın nümayəndələri ilə danışıqlara getməyi tələb edir.
Türk siyasətçi və yazar Aydın Sezer “Sherg.az”a vurğulayıb ki, Suriyada gedən son proseslər fonunda Türkiyənin getdikcə güclənəcəyi fikriylə razılaşmır:
“Çünki Suriyada ciddi şəkildə qeyri-müəyyənlik var. Xüsusilə də Fəratın Şərqindəki kürd qruplaşmaları Amerika və İsrailin qoruması altındadır. Dolayısı ilə Türkiyəni bu məsələdə daha çətin günlər gözləyir. Digər tərəfdən Fəratın Qərbindəki Türkiyənin dəstəklədiyi Suriya Milli Ordusunun yeni Suriya idarəetməsində nə qədər təmsil olunacağı sual altındadır. Çünki “Heyət Təhrir əş-Şam” qruplaşması ilə Türkiyənin əlaqələri tamamilə net deyil. HTŞ hələ də Türkiyədə terror təşkilatı kimi tanınır. Əgər hökümət gələcək zamanlarda HTŞ-ni terror təşkilatı siyahısından çıxararsa, vəziyyəti yenidən dəyərləndirmək lazım olacaq. Suriyanı gözləyən çox ciddi xaos var və oradakı dini, etnik azlıqların yeni idarəetmə sistemində nə qədər təmsil olunacaqları bilinmir. HTŞ Suriyada İslam dövləti qurmaq niyyətindədir. Erməni hərbi ekspertin dediklərini yersiz hesab edirəm. Türkiyə Cənubi Qafqazda təkcə Azərbaycanla deyil, eyni zamanda Ermənistanla münasibətlərini genişləndirmək istəyir”.
