Əli Xameneyi Prezident Məsud Pezeşkiana ABŞ ilə təmas qurmağı qadağan edib
Moskva ABŞ və İran arasında nüvə proqramı ilə bağlı danışıqlarda vasitəçi kimi çıxış etməyə razılaşıb. "Bloomberg" xəbər verir ki, Donald Tramp bunu Vladimir Putinlə telefon danışığı zamanı müzakirə edib. Mövzu ABŞ və Rusiya nümayəndə heyətləri tərəfindən Ər-Riyadda keçirilən görüşdə davam etdirilib. Kremlin sözçüsü Dmitri Peskov Moskvanın danışıqlar formatını dəstəklədiyini və nizamlanmaya kömək etməyə hazır olduğunu təsdiqləyib. Öz növbəsində İran Xarici İşlər Nazirliyinin nümayəndəsi bəyan edib ki, Vaşinqton və Tehran arasında vasitəçilik təklifi təbii diplomatik addımdır.
"Atlas" Araşdırmalar Mərkəzinin rəhbəri Elxan Şahinoğlu "Sherg.az"a deyib ki, Donald Tramp fevralın 12-də rusiyalı həmkarı Vladimir Putinlə telefon söhbətində “bizimlə İran arasında vasitəçi olmanızı istəyirəm” səsləndirməklə hiyləgər gediş edib. Analitikin sözlərinə görə, Putin Trampın təklifinə dərhal razılaşıb:
"Kreml sahibi düşünüb ki, Trampın ona işi düşübsə, deməli, Vaşinqton həm Rusiyanın Ukrayna ilə müharibədə maraqlarını nəzərə alacaq, həm də yaxın gələcəkdə ABŞ-nin Rusiyaya qarşı sanksiyaları ortadan qaldırılacaq. Tramp bunların hər ikisini bu və digər formada reallaşdıra bilər. Ancaq Tramp administrasiyasının ana məqsədi Rusiyanı İranla vasitəçiliyə razı salmaqla Kreml-Tehran arasındakı ittifaqı zəiflətməkdir. Məsələ burasındadır ki, İranın mühafizəkar dairələri Trampla danışıqların əleyhinədir, ali dini lider Əli Xameneyi Prezident Məsud Pezeşkiana Vaşinqtonla təmas qurmağı qadağan edib. Deməli, eyni məntiqlə mühafizəkarlar Kremlin vasitəçiliyini də qəbul etməyə bilərlər, yəni Putinin sözünü yerə salacaqlar. Vaşinqtona da bu lazımdır".
