ABŞ prezidenti Donald Tramp Amerikanın aparıcı nəşrlərindən biri olan “Politico” jurnalının hökumətdən aldığı iddia edilən 8 milyon dollarlıq fondun ən qısa zamanda geri alınmasını tələb edib.
Sherg.az xəbər verir ki, ABŞ Prezidenti Donald Tramp "Truth" sosial hesabındakı paylaşımında Hökumətin Səmərəliliyi Departamentini (DOGE) məsələ ilə bağlı tədbir görməyə çağırıb.
Tramp paylaşımında "Radikal sol "Politico" jurnalına hökumətimiz tərəfindən verilən 8 milyon dollar necə oldu? Zəngin adamlara məxsus olan bu pullar ən qısa zamanda DOGE tərəfindən geri alınmalıdır" deyə bildirib.
Tramp həmçinin ABŞ Ətraf Mühitin Mühafizəsi Agentliyinin Administratoru Li Zeldinin istixana qazlarının tullantılarını azaltmaq üçün çalışan qruplar koalisiyasına nahaq yerə 2 milyard dollar verdiyinə dair iddialara toxunub və Demokratlar Partiyasının 2018-ci ildə Corciya qubernatorluğuna namizədi Steysi Abramsın da daxil olduğu ətraf mühit layihəsinə verilən maliyyənin geri qaytarılmasını tələb edib.
Tramp yanvarın 20-də vəzifəyə başladıqdan dərhal sonra xarici yardım haqqında sərəncam imzalayıb. Fərmanda ABŞ-ın xarici inkişafa yardım proqramlarına cavabdeh olan bütün nazirlik və agentliklərin xarici ölkələrə ödənişlərini kəsəcəyi və proqramın ABŞ xarici siyasətinə uyğunluğunu qiymətləndirmək üçün 90 günlük yoxlama müddətinin başladığı qeyd edilib.
ABŞ Dövlət Departamenti də yanvarın 27-də Departament və USAİD tərəfindən maliyyələşdirilən bütün xarici yardımların dayandırıldığını açıqlayıb.
DOGE-nin rəhbəri İlon Mask, USAİD menecerləri ilə bağlı problemlərə görə işçilərin "inzibati məzuniyyətə" verildiyini açıqlayıb. Agentliyin sosial media hesabları da bağlanıb.
