NATO-nun baş katibi Mark Rutte Odessada bildirib ki, Ukraynanın NATO-ya üzvlüyü sülh sazişinin bir hissəsi olmayacaq.
Bu barədə "Strana.ua" məlumat yayıb.
Rutte bildirib ki, biz heç vaxt Ukraynaya bunun sülh sazişinin tərkib hissəsi olacağına dair vəd verməmişik.
Bununla yanaşı, o, Ukraynanın NATO-ya üzvlüyü məsələsinin gündəmdə qalıb-qalmadığına dair suala "bəli" cavabını verib.
Politoloq İlqar Vəlizadə “Sherg.az”a söyləyib ki, danışıqlara hazırlıq prosesi hələ davam edir:
“Danışıqlar əsnasında müxtəlif variantlar təqdim oluna bilər. Nəticənin necə olacağını isə hadisələr göstərəcək. Digər tərəfdən Rusiyanın Ukraynanın NATO üzvlüyündən əl çəkməsi kimi tələbləri mövcuddur. Yəni gələcək razılaşmalar üçün Rusiya bunu vacib sayır. Ümumiyyətlə, Rutte bu məsələdə iştirakçı deyil və heç nə söyləyə bilməz. İştirakçı ölkələr Rusiya, Ukrayna və Amerika Birləşmiş Ştatlarıdır. Amerika Ukraynaya təzyiq göstərərək həmin müddəanın sazişdə olmasını söyləyir. Ukrayna tərəfi müəyyən dərəcədə buna qarşı gəlir və NATO ilə bağlı heç bir öhdəlik götürməməyə çalışır. Lakin Ukraynanın öz iddialarının üzərində qalıb-qalmayacağını da vaxt göstərəcək. İndiki Rusiya və Amerika rəhbərliyinin mövqeyi Ukraynanın NATO üzvü olmamasından ibarətdir. NATO-nun rəhbərliyi və ayrı-ayr ölkələri çalışır ki, Ukraynaya yardımlar etsin və onun üzvlüyündə dəstək göstərsinlər. Amma aparıcı NATO ölkələri bunu istəməməsi sözügedən məsələ ilə bağlı suallar yaradır. Danışıqlar isə həmin mürəkkəb mövzularla bağlı ortaq məxrəcə gəlmək üçün aparılmalıdır”.
