Beynəlxalq Atom Enerjisi Agentliyinin (MAQATE) direktoru Rafael Qrossi İrandadır.
O, İrana yola düşməzdən əvvəl “Le Monde” qəzetinə verdiyi müsahibədə Tehranın nüvə problemi ilə bağlı İran və ABŞ arasında Omanda başlanan dialoqda öz təşkilatının iştirakını arzuladığını bildirib.
O hesab edir ki, İran nüvə silahı hazırlamağa yaxındır:
“Biz Arakçı və Uitkoff arasında ikitərəfli dialoqun bir hissəsi deyilik, lakin buna biganə də deyilik. Onlar çox yaxşı bilirlər ki, hər hansı potensial razılaşmaya öz sözümüzü deməliyik, çünki bunu sınaqdan keçirən tərəf biz olacağıq. Ona görə də bizim tərəfimizdən onlarla qeyri-rəsmi mübadilələrə başlanılıb”.
Politoloq Samir Hümbətov "Sherg.az"a bildirib ki, əslində hazırda İran və ABŞ arasında bazar prosesi gedir:
"2015-ci ildən 2018-ci ilə qədər nüvə obyektlərinin həyata keçirilməsinə MAQATE nəzarət edirdi. Bu qurumun əlində kifayət qədər materiallar toplanıb desək, çətin olar. Çünki İranın bütün nüvə obyektlərini göstərib-göstərməməsi bəlli deyil. Lakin hər halda MAQATE bundan arxayın olduğunu söyləyir. Odur ki, Rafael Qrossi dialoqda iştirak etməyi arzulayır. Ümumiyyətlə danışıqlar prosesinin ana xəttində MAQATE-nin fəaliyyəti durur. Amma ABŞ və İranın buna razı olub-olmayacağı sual altındadır. Digər tərəfdən açıq görünür ki, İran zamana oynayıb nüvə silahını əldə edənə qədər prosesləri uzatmağa çalışır. Həmçinin Vaşinqtonun təzyiqləri artarsa, Tehran məcburiyyət qarşısında qalıb hərbi müdaxilənin qarşısını almaq üçün danışıqlar masasına otura bilər".
