ABŞ Beynəlxalq İnkişaf Agentliyinin (USAID) ləğv edilməsi 2030-cu ilə qədər 14 milyon insanın həyatına son qoya bilər.
Sherg.az xarici KİV-ə istinadən xəbər verir ki, fonların kəsilməsi davam edərsə və USAID ləğv olunarsa, dünya üzrə 14 milyon insanın (onlardan 4,5 milyonu beş yaşdan aşağı uşaqlardır) öləcəyi proqnozlaşdırılır.
Braziliya, Mozambik, ABŞ və İspaniyadan tədqiqatçıların iştirak etdiyi və yaxın vaxtlarda dərc olunan ISGlobal araşdırmasına görə, bu insanlar QİÇS, vərəm, malyariya, ishal, tənəffüs yolları infeksiyaları və ya qidalanma çatışmazlığı səbəbilə həyatını itirəcək.
QARŞISI ALINA BİLƏN ÖLÜMLƏR ARTIR
Bu ölümlərin əksəriyyəti qarşısı alına bilən hallardır və yoxsulluq, qeyri-kafi gigiyena, sanitariya və əsas səhiyyə xidmətlərinə çıxışın olmaması ilə əlaqəlidir.
Araşdırmanın baş müəllifi Davide Rasella bildirib:
“Bu kəsintilər, xüsusilə də qəfil olduğu üçün, həssas əhalinin sağlamlığına daimi zərər vuracaq. Sistem müəyyən qədər maliyyə çatışmazlığına uyğunlaşa bilər, lakin bu qədər sərt və qəfil maliyyə itkisi ilə başa çıxmaq gücünə malik olmayan insanlara qarşı tətbiq olunması qəbuledilməzdir.”
BÜTÜN DÜNYAYA TƏSİR EDƏN QƏRAR
Araşdırmaya görə, ABŞ-ın maliyyə dəstəyini dayandırması bir çox dəhşətli nəticələrə səbəb olub.
Məsələn, 31 ölkədə vərəmə nəzarət təşkilatlarının 25%-i fəaliyyətini dayandırıb. BMT-nin Ümumdünya Ərzaq Proqramı (WFP) Cənubi Afrikadakı Yohannesburq ofisini bağlamaq qərarına gəlib. Böyük bir quraqlıq fonunda 27 milyon insan ifrat aclıq təhlükəsi ilə üzləşib və malyariya ilə mübarizə proqramlarının dayandırılması nəticəsində əlavə 15 milyon yoluxma və 107 min yeni ölüm riski yaranıb.
Bu maliyyə kəsintiləri milyonlarla qarşısı alına bilən ölümə səbəb olmaqla yanaşı, “aşağı və orta gəlirli ölkələrdə səhiyyə və sosial-iqtisadi inkişaf sahəsində on illərlə əldə olunmuş nailiyyətlərin geriyə dönməsi riskini də daşıyır.”
Yanvar ayının sonunda Donald Tramp inkişaf yardımı fondlarını 90 günlük müddətə dondurma qərarı vermişdi.
ABŞ Dövlət katibi Marko Rubionun sözlərinə görə, hazırda USAID tərəfindən koordinasiya olunan proqramların 83%-i ləğv edilib, lakin bu qərara qarşı məhkəmədə etiraz edilir.
