Rusiya Prezidenti Vladimir Putin ABŞ prezidentinin xüsusi nümayəndəsi Stiven Uittkoff ilə Ukraynanın sülh planını müzakirə etməkdən imtina edib.
Teleqraf xəbər verir ki, bu barədə “Financial Times” məlumat yayıb.
Nəşrin məlumatına görə, ABŞ, Ukrayna və Avropa nümayəndələrinin birgə apardığı danışıqlar nəticəsində Ukraynadakı münaqişənin sülh yolu ilə həlli üçün 22 maddəlik plan hazırlanıb.
"Planda atəşkəs elan edilməsi və Moskvanın tələbi olan Ukraynanın NATO-ya qoşulmaması şərti yer alırdı. Lakin, Rusiya tərəfi bu təklifi qəbul etməyib", - məlumatda deyilir.
Nəşrin mənbələrinə görə, Rusiya rəsmiləri Stiven Uittkoffa bildiriblər ki, Putin Ukrayna və Avropanın iştirakı ilə hazırlanan bu sülh planını müzakirə etmək niyyətində deyil. Bu vəziyyət, Uittkoffu Putinlə növbəti görüşü təxirə salmağa məcbur edib.
Eyni zamanda, mənbə qeyd edib ki, ABŞ-nin xüsusi nümayəndəsinin Putinlə təkrar görüşü ilkin olaraq planlaşdırılmamışdı.
