İstanbulda keçirilən danışıqlarda tərəflər əslində məsələyə tamamilə fərqli mövqelərdən yanaşacaqlar
Rusiya və Ukrayna nümayəndə heyətləri arasında danışıqlar İstanbulda başlayıb.
Bu barədə "RİA Novosti" məlumat yayıb.
Məlumata görə, Ukrayna nümayəndə heyətinə ölkənin müdafiə naziri Rustem Umerov, Rusiya tərəfinə isə prezidentin müşaviri Vladimir Medinski rəhbərlik edir.
Danışıqlarda Türkiyəni Milli Kəşfiyyat Təşkilatının (MİT) direktoru İbrahim Kalın və xarici işlər naziri Hakan Fidan təmsil edir.
Qeyd edək ki, danışıqların birinci raundu mayın 16-da keçirilib.
Politoloq Oqtay Qasımov Sherg.az-a bildirib ki, İstanbulda keçiriləcək görüş müsbət hal sayılsa da, müharibə ilə bağlı danışıqlara əhəmiyyətli təsir göstərməyəcək:
"Nəzərə alaq ki, müzakirələr öncəsi hələ də Ukraynanın əraziləri kütləvi raket-dron hücumlarına məruz qalır. Həmçinin Ukrayna silahlı qüvvələri Rusiya ərazisində unikal əməliyyat keçirdilər. Bu isə həm Rusiya, həm də dünya güclərinə bir mesajdır. Kiyev göstərdi ki, onun hərbi qabiliyyətini məhv etmək mümkün deyil. Odur ki, Ukrayna müqavimətini dayandırmayacaq. İstanbulda keçirilən danışıqlarda tərəflər əslində məsələyə tamamilə fərqli mövqelərdən yanaşacaqlar. Ukraynanın əsas tələbi Rusiyanın işğal olunmuş ərazilərlə bağlı tutduğu mövqedən geri çəkilməsidir. Kreml isə öz növbəsində maksimalist yanaşma sərgiləyərək prosesi davam etdirməyə və istəklərini qəbullandırmağa çalışacaq".
