ABŞ Dövlət katibi Marko Rubio ölkənin xarici ölkələrdəki diplomatlarına göstəriş verib ki, xaricdə keçirilən seçkilərin ədalətliliyi və şəffaflığı barədə fikir bildirməsinlər.
Teleqraf xəbər verir ki, bu barədə "Reuters" agentliyi Dövlət Departamentinin daxili sənədinə istinadla məlumat yayıb.
Bildirilir ki, iyulun 17-də göndərilən təlimata əsasən, ABŞ Dövlət Departamenti artıq xaricdəki seçkilərlə bağlı Vaşinqtondan rəsmi açıqlamalar və ya sosial şəbəkə paylaşımları etməyəcək.
"Yalnız ABŞ-nin konkret və ciddi xarici siyasət maraqları olduğu hallar istisna edilə bilər", - məlumatda deyilir.
Sənəddə qeyd olunur ki, seçkilərlə bağlı şərhlər sadə və qısa olmalı, əsasən qalib gələn namizədin təbrikinə və ABŞ ilə ümumi maraqlara yönəlməlidir: "Mesajlarda həmin ölkədə seçkilərin legitimliyi, demokratikliyi və ya ədalətliliyi ilə bağlı fikir yer almamalıdır".
