Avropa ölkələri və Ukrayna hərbi əməliyyatları dayandırmaq üçün 12 bəndlik plan hazırlayır.
Teleqraf xəbər verir ki, bu barədə "Bloomberg" məlumat yayıb.
Nəşrin məlumatına görə, planın icrasına ABŞ Prezidenti Donald Trampın sədrliyi ilə beynəlxalq sülh şurası nəzarət edəcək. Sənədin əsas müddəalarına atəşkəs və tərəflərin hərbi hücumlarını dayandırmaq öhdəliyi, bütün deportasiya edilmiş uşaqların Ukraynaya qaytarılması, tam miqyaslı məhbus mübadiləsi, Ukrayna üçün təhlükəsizlik zəmanətləri, yenidənqurma işlərinin maliyyələşdirilməsi və Ukraynanın Aİ- yə daxil olması üçün sürətləndirilmiş yol daxildir.
Qeyd olunur ki, Rusiyaya qarşı sanksiyalar mərhələli şəkildə aradan qaldırılacaq, lakin Mərkəzi Bankın dondurulmuş təxminən 300 milyard dollarlıq aktivləri yalnız Rusiya Ukraynanın yenidən qurulmasında iştiraka razılıq verdikdən sonra Moskvaya qaytarılacaq . Rusiya Ukraynaya yenidən hücum edərsə, məhdudiyyətlər avtomatik olaraq bərpa olunacaq.
