"ABŞ Kanada mallarına tətbiq olunan rüsumları bir ay müddətinə dayandıracaq".
Teleqraf.com xəbər verir ki, bunu Kanadanın baş naziri Castin Trüdo "X" sosial şəbəkəsində yazıb.
Siyasətçi ABŞ prezidenti Donald Trampla yaxşı telefon danışığı apardığını deyib . Trüdo bildirib ki, Kanada sərhədi yeni helikopterlər, texnologiya və personalla gücləndirəcək 1,3 milyard dollarlıq sərhəd nəzarəti planını həyata keçirir. Bu layihədə 10 minə yaxın insan iştirak edir.
Baş nazir qeyd edib ki, rəsmi Ottava Vaşinqtonla koordinasiyanı artırıb və narkotikin yayılmasına qarşı mübarizə üçün əlavə öhdəliklər götürüb.
"Kartellər terror təşkilatları siyahısına daxil ediləcək, sərhəddə 24 saat müşahidə aparılacaq. Mütəşəkkil cinayətkarlığa, çirkli pulların yuyulmasına və narkotik ticarətinə qarşı mübarizə aparmaq üçün Kanada-Amerika birgə işçi qrupu yaradılacaq. Kanada bunun üçün 200 milyon dollar xərcləmək niyyətindədir, Ottava Vaşinqtonla bu məsələlərdə birgə işləyir” - baş nazir deyib.
