Donald Tramp administrasiyası Əfqanıstan, Suriya, Yəmən və silahlı münaqişənin davam etdiyi digər 11 yoxsul ölkədə milyonlarla insanın sağ qalmasına kömək edən Ümumdünya Ərzaq Proqramı çərçivəsində BMT-nin fövqəladə proqramları üçün maliyyə vəsaitini kəsib.
Trend xəbər verir ki, bu barədə “Associated Press” agentliyi məlumat yayıb.
BMT-nin Ümumdünya Ərzaq Proqramı (WFP) “X” sosial media platformasında ABŞ-ı yeni maliyyə kəsimlərini ləğv etməyə çağırıb. Birləşmiş Ştatların iki rəsmisi, bir BMT nümayəndəsi və “Associated Press” tərəfindən əldə edilən sənədlərə görə, müqavilənin qəfil ləğvi ABŞ Beynəlxalq İnkişaf Agentliyi (USAID) tərəfindən həyata keçirilən son humanitar proqramların bəzilərinə təsir edib. WFP vurğulayıb ki, bu, milyonlarla insan üçün ölüm hökmü deməkdir. O, ABŞ administrasiyasının 14 ölkədə təcili ərzaq yardımının maliyyələşdirilməsinin dayandırdığını göstərən son hadisələrdən dərin narahatlıq hissini ifadə edib.
Dövlət katibi Marko Rubio və digər administrasiya rəsmiləri daha əvvəl vəd etmişdilər ki, təcili ərzaq yardımı proqramları və digər həyati əhəmiyyətli layihələr kütləvi yardımın kəsilməsindən təsirlənməyəcək. Amma onlar ABŞ Hökumətinin Effektivliyi Departamentinin (DOGE) yüksəkvəzifəli əməkdaşı Ceremi Levinin göstərişi ilə hökumətin maraqlarına uyğun olaraq ləğv edilib.
Yoxsulluq, aclıq və qeyri-sabitliklə mübarizə aparan Suriyada son günlərdə təqribən 230 milyon dollarlıq yardım müqavilələri ləğv edilib. Sənəddə deyilir ki, Suriyadakı proqramların ən böyüyü, 111 milyon dollarla 1,5 milyon insanı çörək və digər gündəlik ərzaqla təmin edib. Son bir həftə ərzində 60-a yaxın xitam məktubu göndərilib. BMT-nin Yaxın Şərq üzrə nümayəndəsi ABŞ-ın Yəmən, Livan və İordaniyada da yardımları dayandırdığını bildirib. Somali, Əfqanıstan və Zimbabvedəki əsas humanitar fəaliyyətlər, o cümlədən müharibə nəticəsində evlərini tərk etmək məcburiyyətində qalan insanlara qida, su, tibbi yardım və müvəqqəti sığınacaq təmin edən proqramlar da bundan təsirlənib. Əfqanıstana humanitar yardımda təxminən 560 milyon dollar kəsilib – bu vəsaitlər təcili ərzaq yardımı, tibbi xidmət, təmiz suya çıxış, təcili psixi sağlamlıq xidmətinə ayrılırdı. ABŞ rəsmiləri hətta bu ölkədə təhsil alan əfqan qızların da öz vətənlərinə qayıtması barədə düşünürlər.
