Marko Rubio demək istəyir ki, Suriyadakı siyasi stabilliyə təhlükələr var
ABŞ Dövlət katibi Marko Rubio iddia edib ki, Suriya vətəndaş müharibəsinə yaxındır. Rubio bildirib ki, Vaşinqtonun qiymətləndirməsinə görə, Suriyada keçid hakimiyyətinin dağılmasına, tammiqyaslı vətəndaş müharibəsinə və buna əsasən də ölkənin parçalanmasına bir aydan da az vaxt - həftələr qalıb. Xatırladaq ki, Bəşər Əsədin devrilməsindən sonra Suriyanın müvəqqəti Prezidenti Əhməd əş-Şaranın rəhbərliyi ilə yeni hökumət formalaşıb. Keçid hökumətinin prezidenti xalqı güclü və sabit dövlət quruculuğunun başlanacağına əmin edərək, bütün vətəndaşları birgə çalışmağa çağırıb. O, hökumətin fəaliyyətinin tam şəffaf olacağını və korrupsiyaya yol verilməyəcəyini bildirib. Yeni kabinetdə keçid hökumətinin xarici işlər naziri Əsəd Həsən əl-Şibani, müdafiə naziri isə Murhaf Əbu Qəsrdir.
Azərbaycan Demokratik Partiyasının sədr müavini Həsrət Rüstəmov "Sherg.az"a deyib ki, bununla Mark Rubio demək istəyir ki, Suriyadakı siyasi stabilliyə təhlükələr var. Ekspertin qənaətincə, həm də ABŞ dövlət katibi yəni bunu bir şey icad edibmiş kimi sevincək bildirib:
"Guya heç kim bilmir ki, Suriyada Türkiyənin fəal dəstəyi ilə yaranmış son stabillik son dərəcə kövrəkdir. Aydındır ki, uzun müddət destabilizasiya bir-birinə zidd iç qüvvələrin silahlı qarşıdurması şəraitində mövcud olan bir ölkədə davamlı sabitlik çətin bir işdir. Hələ nəzərə alaq ki, bölgədən uzaqda yerləşən güclərin poliqonuna çevrilən bir ölkədə bunu etmək olduqca mürəkkəbdir. Ona görə də Rubio yeni bir şey demir. Çox güman ki, həm Suriyanın keçid hökumətinə, həm də Türkiyəyə mesajlar verir".
H.Rüstəmov hesab edir ki, bu mesajların içində ABŞ bu bölgədə stabillik istəmir mesajı da ola bilər:
"Hər halda Trampın Yaxın Şərq səfərindən sonra belə bir bəyanatın səslənməsi heç də təsadüfi sayılmamalıdır. Ümid edək ki, Suriyanın keçid hökuməti bu bəyanatı düzgün qiymətləndirər və uyğun addımlar atmaqla iç sabitliyin qorunmasına çalışar".
