Əgər Tehranın nüvə proqramını dayandırmaq üçün danışıqlarda tez bir zamanda nəticə əldə edə bilməsə, ABŞ tezliklə İrana hücum edə bilər.
Axar.az xəbər verir ki, bu sözləri ABŞ-ın İran üzrə xüsusi nümayəndəsinin keçmiş müavini Riçard Nefyu “Foreign Affairs” jurnalı üçün yazdığı məqalədə bildirib.
Diplomat Tehrana qarşı hərbi əməliyyatı məcburi tədbir adlandırıb:
“Hərbi fəaliyyətlə bağlı riskləri nəzərə alaraq, Birləşmiş Ştatlar Tramp administrasiyasının əvvəlində Tehranın nüvə proqramını dayandırmaq üçün danışıqlara vicdanla son bir cəhd etməlidir. Amma əgər Birləşmiş Ştatlar İranın nüvə silahına malik olduğu bir dünyada yaşamağa hazır deyilsə, onda İrana hücum etməkdən başqa çarə yoxdur - və bu, tezliklə olmalıdır”.
Eks-məmurun sözlərinə görə, ABŞ-ın problemi diplomatik yolla həll etməyə çalışmaq üçün çoxlu səbəbləri var, çünki Amerika rəsmiləri hərbi əməliyyatın uğurlu nəticəsinə əmin deyillər:
“Həmçinin nüvə dövlətinin İrana hücumu Tehranı yalnız nüvə silahı yaratmağa sövq edə bilər, Tehrana qarşı tam hərbi kampaniya isə ABŞ üçün ağır ola bilər”.
