Bayden Ərdoğan görüşündə gələcək əməkdaşlığın bünövrəsi qoyulacaq
Yaxın günlərdə Türkiyə Prezidenti Rəcəb Tayyib Ərdoğan ABŞ-ın yeni Prezidenti Cozef Baydenlə görüşəcək. Bununla bağlı Türkiyə prezidentinin mətbuat katibi İbrahim Kalın və ABŞ milli təhlükəsizlik müşaviri Cek Sallivan arasında telefon danışığı olub.
Baydenin indiyə kimi dörd dəfə Türkiyədə olduğunu, Prezident Ərdoğanı şəxsən tanıdığını bildirən Sallivan ABŞ prezidentinin Türkiyə lideri ilə yaxından əməkdaşlıq etmək istədiyini qeyd edib. O, həmçinin, Türkiyənin nə qədər mühüm bir ölkə olduğunu vurğulayıb.
Sabiq dövlət müşaviri, politoloq Qabil Hüseynli yaxın zamanda baş tutacaq görüş haqqında fikirlərini "Şərq"lə bölüşüb:
"Əslində Cozef Bayden seçki öncəsi Ərdoğana qarşı xoş olmayan fikirlər səsləndirmişdi. O bildirmişdi ki, müxalif qüvvələrə yardım etməklə Ərdoğanı hakimiyyətdən devirmək niyyətindədir.
Bu zaman Bayden öz təəssüratlarına əsaslanaraq çıxış edirdi. Lakin dövləti idarə etmək üçün tamam başqa situasiyada olmaq lazımdır. Buna görə də seçkiqabağı söylənilən fikirlərin əksəriyyəti unudulur və günün tələblərinə uyğun olaraq hərəkət etmək lazım olur".
Politoloq gözlənilən görüşün hər iki ölkə üçün uğurlu olacağını qeyd edib:
"Türkiyə NATO-ya daxil olan əhəmiyyətli dövlətlərdən biridir. Ərdoğanın hakimiyyətdə olduğu dövrdə bu ölkə çox inkişaf etmişdir.
Türkiyənin coğrafi mövqeyi NATO, xüsusilə ABŞ üçün böyük əhəmiyyət kəsb edir. Fikrimcə, Ərdoğan və Baydenin görüşü zamanı gələcəkdəki əməkdaşlığın bünövrəsi qoyulacaq.
Buna görə də iki ölkə arasında hər hansı bir problem və ya ziddiyyət yaşanmayacaq. Əksinə, Amerika çalışacaq ki, Türkiyə ilə daha yaxın və mehriban müttəfiq olsun".
Aytac Ali
