Afrika İttifaqı 2023-cü ildə dövlət çevrilişi və ölkədə hərbi nəzarəti ələ keçirdikdən sonra Qabona qarşı tətbiq etdiyi sanksiyaları ləğv edib.
Teleqraf xəbər verir ki, bu barədə İttifaqın Sülh və Təhlükəsizlik Şurasının rəsmi portalında yayılan kommünikedə deyilir.
“Biz Qabona qarşı sanksiyaları dərhal ləğv etmək qərarına gəldik”, - deyə sənəddə vurğulanır. Şuranın bəyanatına görə, sanksiyaların ləğvi üçün əsas Qabonda keçid dövrünün uğurla başa çatması olub.
Qabonun bir qrup hərbi qulluqçusu 2023-cü il avqustun 30-da ölkədə hakimiyyəti ələ keçirib. Onlar 2023-cü il avqustun 26-da keçirilən və üçüncü müddətə namizədliyini irəli sürən Əli ben Bonqo Ondimbanın qalib gəldiyi prezident seçkilərinin nəticələrini ləğv ediblər. Generalların iclasında Bris Oliqi Nguema keçid dövrü üçün dövlət başçısı təyin edilib. 2024-cü ilin noyabrında ölkə üçün yeni konstitusiya qəbul edildi və aprelin 12-də keçirilən seçkilərdə Nguema qalib gəldi. Beləliklə, Qabon konstitusiya idarəçiliyinə qayıtdı.
Afrika İittifaqı Sülh və Təhlükəsizlik Şurası bu beynəlxalq təşkilatın kollektiv təhlükəsizliyinin daimi idarəetmə orqanlarından biridir. O, münaqişələrin qarşısının alınması, idarə edilməsi və həlli ilə məşğul olur. Hazırda Afrika İttifaqı Burkina Faso, Qvineya, Mali, Niger və Sudana qarşı sanksiyalar tətbiq edir.
