Dəməşqə doğru irəliləyən “Heyəti Təhrir əş-Şam” (HTŞ) qruplaşmasının Bəşər Əsəddən sonra hansı mövqedə olacağı müzakirə mövzusu olub.
Axar.az Türkiyə mediasına istinadən xəbər verir ki, Ankaranın “yeganə yol siyasi həll yoludur” çağırışına qulaq asan HTŞ-dən ölkədə normallaşmanı sürətləndirəcək kritik bir açıqlama gəlib.
“Heyəti Təhrir əş-Şam” (HTŞ) qruplaşmasının lideri Əbu Məhəmməd Colani bildirib ki, hakimiyyəti Suriya Keçid Hökumətinə təhvil verməyə hazırdırlar:
“Önümüzdəki həftələrdə HTŞ də daxil olmaqla, bütün silahlı döyüşçülərə mülki əraziləri tərk etmə təlimatı veriləcək. Şəhərdəki bürokratlar öz işlərini davam etdirmək üçün dəvət olunacaqlar. Şəhərin fərqli sosial və mədəni normalarına uyğun olaraq müsəlmanlar kimi, xristianlara da hörmət ediləcək”.
Türkiyə mediası yazır ki, müxaliflər bu müddət ərzində Hələbin ölkənin yeni paytaxtı ola biləcəyini bildirirlər.
Bundan başqa, qeyd olunur ki, HTŞ-nin planı Hələbdəki idarəçiliyi bölüşən ortaq düşüncə prinsipini nəzərdə tutur. Bütün seqmentlərin təmsil olunduğu bu müvəqqəti idarədə İdlib və Həma kimi vilayətlər də inzibati mərkəz olaraq bir növ paytaxt rolunu oynayacaq.
