Ukraynanın da, Zelenskinin də vəziyyəti ürəkaçan deyil
Ukraynanın "Həyat uğrunda müxalifət platforması" partiyası ölkə rəhbəri Vladimir Zelenskinin impiçment prosedurunu hazırlayıb.
V.Zelenskiyə qarşı hazırlanan impiçment proseduru telekanalların bağlanması qərarı ilə bağlıdır.
Qeyd edək ki, Ukrayna Prezidenti Vladimir Zelenski Təhlükəsizlik və Müdafiə Şurasının "112. Ukrayna", "NewsOne (XəbərBir)" və "ZIK" telekanalları ilə bu kanalların sahibi, "Həyat uğrunda müxalifət platforması" partiyasından olan deputat Taras Kozaka qarşı 5 il müddətində sanksiya qərarını təsdiq edib.
Məlum olduğu kimi, bu kanallar müxalifətyönümlüdür və orada tez-tez müxalifət platformadan olan deputatlar çıxış edirdilər.
Kanallara qoyulan sanksiya qərarlı sənəd dərc olunduğu gündən - fevralın 2-dən qüvvəyə minib.
Nəzərə çatdıraq ki, sözügedən telekanallar kabel şəbəkəsi ilə yayımlarını dayandıraraq fəaliyyətlərin yutubda davam etdirirlər.
Ukraynada baş verən iqtidar-müxalifət qarşıdurması, eləcə də Zelenskinin impiçmantı haqqında tarix üzrə elmlər doktoru, professor Məhərrəm Zülfüqarlı "Şərq"ə bildirib:
"Ukraynada vəziyyət keçid dövrü yaşadıqlarına görə ürəkaçan deyil. Qərb ölkələrinin dəstəyi ilə orda hakimiyyət dəyişikliyi baş verdi. Rusiya ilə də müharibə vəziyyəti yarandı. Donetsk və Luqansk vilayətində respublika şəklində ayrıca qruplar yarandı. Yəni slavyan xalqı olan Ukrayna ilə Rusiya arasında qatı düşmənçilik yarandı...
Ukraynada vəziyyət həm də ona görə gərgindir ki, rusmeyilli qüvvələr ilə qərbyönümlü qüvvələr arasında konflikt yaranıb. Qərbyönümlü tərəflər qatı millətçi ukraynalılardır. Şərqdə isə Rusiyaya meyli olan əhali dayanır. Ona görə də Ukraynada tez-tez həmin qüvvələr mitinqlər keçirirlər, lap əvvəllər gedib nazirləri otaqlarından çıxarıb özləri otururdular yerlərində.
Bu artıq demokratiya deyil, ondan istifadə hallarıdır.
Daha sonra, Ukrayna ilə Macarıstan arasında müəyyən bir problem var. Qərbdə etnik-macar azlığı yaşayır. Onların hüquqları ilə bağlı bəzi problemlər də mövcuddur. Bu baxımdan Zelenskinin vəziyyəti elə də ürəkaçan deyil".
Professor M.Zülfüqarlı deyir ki, V.Zelenskinin demokrat kimi hakimiyyətə gəlməsi ilə hazırkı hərəkəti üst-üstə düşmür: "Əgər demokrat kimi hakimiyyətə gəlib indi telekanallara məhdudiyyət qoyursa, bu artıq Zelenskinin demokratiyadan geri çəkilməsi kimi başa düşülə bilər. Çünki 4-cü hakimiyyətə hər hansı bir məhdudiyyətin qoyulması demokratiya ilə heç uyğunlaşmır.
Bu da yəqin ki, daxili vəziyyətin gərginliyindən irəli gəlir. Amma biz istəyərdik ki, Ukraynada siyasi böhran tezliklə aradan qalxsın. Rusiya ilə müharibə başa çatsın və qonşularla normal münasibət başlasın.
Ukraynada çox ciddi seçki kampaniyaları keçirilir. Həm prezident, həm də parlament seçkiləri ərəfəsidir. Yəni Zelenski güclü lider kimi yenidən seçilər, ya da bu cür fəaliyyəti ilə reytinqini salar və yerinə başqası seçilə bilər. Onlarda hazırkı vəziyyət-demokratiya keçid mərhələsindədir. Həmin ölkələrdə də həmişə çox böyük gərginliklər yaşayırlar".
Ağarza Elçinoğlu
