Avropa Komissiyasının (AK) prezidenti Ursula fon der Leyen ABŞ-yə güzəştə getməkdən imtina edə bilər, çünki Brüssel Vaşinqtondan fərqli olaraq BMT-nin istixana qazı emissiyalarının azaldılması sazişini dəstəkləyir.
Teleqraf xəbər verir ki, bu barədə “Euractiv” portalı məlumat yayıb.
Portalın mənbələrinə görə, AK rəhbəri BMT-nin təşəbbüsünü dəstəkləyən ölkələrə qarşı sanksiyalarla hədələyən ABŞ-dən fərqli olaraq ekoloji sazişlə bağlı qəti mövqe nümayiş etdirib. Bu məlumat təsdiqlənərsə, fon der Leyen ilk dəfə olaraq ABŞ Prezidenti Donald Trampa meydan oxuyacaq, baxmayaraq ki, Avropa İttifaqı əvvəllər Vaşinqtonla ortaq məxrəcə gəlməyə çalışıb.
Oktyabrın 15-də “Financial Times” yazmışdı ki, Brüssel Ağ Evdən yan keçərək, ABŞ ilə münasibətlərdə iqlim və enerji gündəmini birbaşa dövlət rəhbərləri və biznes qurumları ilə həyata keçirməyə hazırdır. Məlumata görə, Aİ iqlim dəyişikliyi qaydalarına uyğun olaraq ABŞ şirkətlərinə güzəştə getməkdən imtina edib.
