Avropa İttifaqı Rusiyanın “kölgə donanması” adlandırılan tankerlərinə qarşı daha sərt mövqe nümayiş etdirmək istəyir. Xüsusən də müvafiq orqanlara gəmilərə minmək və yoxlamalar aparmaq səlahiyyəti verəcəyi güman edilir.
Teleqraf xəbər verir ki, bu barədə “Politico” nəşri məlumat yayıb.
Nəşr Aİ xarici işlər nazirlərinin oktyabrın 20-də keçiriləcək görüşü üçün hazırlanmış sənəd layihəsinə istinadən yazır ki, ittifaq yoxlamalar üçün “kölgə donanması” gəmilərinə enməyə icazə vermək istəyir.
Çünki bu tankerlər “neytral bayraq” altında işləyərək Rusiya neftini daşıyır, bu isə nəzəri olaraq onları saxlamağa hüquq vermir. Lakin Aİ bu gəmilərin ətraf mühitə və gəmiçilik təhlükəsizliyinə təhdid yaratdığına inanır.
Bundan əlavə, “kölgə donanması” NATO ölkələrinin kritik infrastrukturu üçün potensial təhlükədir, çünki onlar hibrid hücumlar üçün platforma kimi istifadə edilə bilər. Məsələn, bir sıra Avropa ölkələrində qeydə alınan Rusiya pilotsuz təyyarələri məhz belə tankerlərdən buraxıla bilərdi.
Avropa Xarici Fəaliyyət Xidməti beynəlxalq dəniz hüququ çərçivəsini gücləndirmək məqsədilə bəyannamə layihəsinin müzakirəsinə başlayıb. Xüsusilə, Aİ hüquq-mühafizə orqanları “kölgə donanması”na aid tankerlərə minib yoxlaya biləcəklər.
Ehtimal olunur ki, bəyannamə layihəsi noyabrın sonunadək hazırlanacaq və Aİ ölkələrinin xarici işlər nazirliklərinin rəhbərlərinin növbəti görüşündə qəbul ediləcək. Bundan sonra Aİ-nin baş diplomatı Kaia Kallas Rusiya gəmilərinin bayraqları altında üzdüyü ölkələrlə danışıqlar aparacaq.
