İtaliyada hava limanı işçiləri 26 iyulda dörd saatlıq ümummilli tətil keçirəcək ki, bu da turizm mövsümünün qızğın çağında onlarla reysin gecikməsinə və ləğvinə səbəb ola bilər.
"Report"un "Euronews" telekanalına istinadən məlumatına görə, baqaj daşıyıcıları, yerüstü xidmət personalı və hava limanı işçiləri yerli vaxtla saat 13:00-dan 17:00-dək bütün böyük İtaliya hava limanlarında tətilə çıxacaq.
Etirazçılar iş yerlərində təhlükəsizlik səviyyəsinin artırılması, əmək şəraitinin yaxşılaşdırılması və peşəkar və şəxsi həyat arasında sağlam balansın təmin edilməsi də daxil olmaqla bir sıra tələblər irəli sürürlər.
Bundan əlavə, işçilər sosial təminatların qorunması ilə milli əmək müqavilələrinin uzadılmasında israr edirlər.
Vəziyyəti ağırlaşdıran odur ki, eyni zamanda İspaniya və Portuqaliya hava limanlarında da tətillər keçiriləcək. Yay mövsümünün qızğın çağında minlərlə səyahətçi üçün əsl nəqliyyat kollapsının yaranma təhlükəsi var.
İtaliyada etiraz aksiyaları ölkənin əsas hava limanlarına təsir edəcək: Milan-Malpensa, Milan-Linate, Roma-Fiumicino, Florensiya, Neapol və Venesiya. Xüsusilə çətin vəziyyət Milan-Linate hava limanında gözlənilir - burada sərnişinlərin qeydiyyatı və minmə qapılarının xidməti üçün məsul olan "Swissport" şirkətinin əməkdaşları da tətilə qoşulacaqlar.
İspaniyada tətil hərəkatına marşrut şəbəkəsi 100-dən çox Avropa şəhərini əhatə edən "Volotea" aviaşirkətinin ekipajı və pilotları rəhbərlik edirlər. Bu, məşhur turist istiqamətləri arasında hava əlaqəsini ciddi şəkildə poza bilər.
Ən uzunmüddətli etiraz aksiyası Portuqaliyada gözlənilir - burada "Groundforce" şirkətinin (Menzies Aviation kimi tanınır - red.) işçiləri 26 iyul saat 00:00-dan 29 iyul saat 00:00-dək üç günlük tətil elan ediblər. Onların qərarı Lissabon hava limanının işini iflic edə bilər.
Üstəlik, etirazçılar avqust ayı boyunca tətilləri təkrarlamağı planlaşdırırlar: 8-11, 15-18, 22-25 və 29 avqustdan 1 sentyabra qədər.
