Millət vəkili: “Putin-Tramp görüşü baş tutsa, dünya yenidən bölüşdürülə bilər”
"Kiyevin Rusiya ilə sammit tələbi Ukrayna birləşmələrinin həyata keçirdiyi açıq terror aktları fonunda qəribə səslənir". Bunu Rusiya Prezidenti Vladimir Putin hökumət üzvləri ilə keçirdiyi iclasda bildirib. O qeyd edib ki, Kiyev Rusiyada dinc infrastruktura hücumlar həyata keçirir və eyni zamanda hərbi əməliyyatları 30, hətta 60 gün müddətinə dayandırmağı xahiş edir, ən yüksək səviyyədə görüşün keçirilməsini xahiş edir. "Bəs bu şəraitdə belə görüşlər necə keçirilə bilər? Nədən danışmaq olar?" deyə Putin sual verib. Rusiya rəhbəri vurğulayıb: "Ümumiyyətlə, terrora "stavka" edənlərlə kim danışıqlar aparır? Terrorçularla? Hərbi əməliyyatlara möhlət verməklə onları nəyə görə cəsarətləndirmək lazımdır ki?". Prezident Vladimir Putin Bryansk və Kursk vilayətlərində baş verən terror aktlarından sonra Ukrayna ilə sammitin keçirilməsi və atəşkəsin təşkili imkanlarını şübhə altına alıb. O, hücumları dinc əhaliyə qarşı "məqsədyönlü zərbə" adlandırıb. Qeyd edək ki, Ukrayna Prezidenti V.Zelenski Putinlə görüşə biləcəyini demişdi. Ağ Evin mətbuat katibi Karolina Levitt isə bildirib ki, ABŞ Prezidenti Donald Tramp Rusiya və Ukraynadan olan həmkarları ilə görüşə hazırdır. Levitt qeyd edib ki, Tramp hər iki liderin, hər iki tərəfin danışıqlar masası arxasında oturmasını istəyir: "Biz bu gün onların Prezident Trampın çağırışı ilə bunu (İstanbulda - red.) necə etdiklərini gördük".
Millət vəkili Rasim Musabəyov deyib ki, Ukraynanın Rusiya ərazisində həyata keçirdiyi əməliyyatı heç kim terror hücumu adlandırmır. Deputatın sözlərinə görə, Ukrayna Rusiya ərazisində birbaşa hərbi infrastruktura zərbə endirib:
"Hücum nəticəsində məhv edilən təyyarələr Ukrayna ərazisini bombardman edən hərbi vasitələr idi. Legitim zərbələr üçün önəmli hədəflərdən idi. Ukrayna məhz həmin təyyarələri hədəf aldı. Ancaq Vaşinqtonun bu məsələdə müəyyən məsafə saxlaması təbiidir. Hərbi hədəflərin zərərsizləşdirilməsində ABŞ-nin adının hallanması Rusiyanın Vaşinqtona iddialarla çıxış etməsinə gətirib çıxara bilərdi. Yenə deyirəm, Ukrayna tamamilə müharibə qanunlarına uyğun əməliyyat keçirib. Sadəcə, təyyarələrin vurulması deyil, eyni zamanda Krım körpüsünə zərbə də hərbi qanunlara zidd sayılmır. Çünki Krım körpüsü ilə hərbi daşınmalar həyata keçirilir". Parlamentari əlavə edib ki, əslində, Rusiya dövlət başçısı V.Putin Ukrayna prezidenti ilə görüşmək istəmir: "Ola bilsin, Türkiyə prezidenti ilə Putinin görüşü baş tutsun. Amma Putinin əsas istəyi məhz ABŞ Prezidenti Donald Trampla görüşməkdir. Əgər Trampla görüş alınarsa, sonrakı mərhələdə Kreml rəhbəri Zelenski ilə görüşdən yayınmaz. Putinin Trampla görüşündə məqsəd isə dünyanın yenidən bölüşdürülməsi ilə bağlı ola bilər".
