Rusiya heç vaxt Ukraynanın 1991-ci il sərhədlərinə qayıtmasına icazə verməyəcək.
Bu barədə Rusiya Xarici İşlər Nazirliyi məlumat yayıb.
Məlumatda deyilir ki, Kiyev və onu dəstəkləyən Qərb ölkələri Ukraynanı 1991-ci il sərhədlərinə qaytarmaq istəyirlər. Rusiya isə bu cür bir ssenarinin gerçəkləşməsinə heç vaxt icazə verməyəcək.
Politoloq Zeynal Əmrəliyev Sherg.az-a bildirib ki, Qərb ölkələrinin Ukraynanı əvvəlki sərhədlərinə qaytarmaq kimi niyyətləri yoxdur:
“Avropa ölkərində bununla bağlı müəyyən anlaşma ola bilər. Ancaq Amerika Krımı Rusiyanın ərazisi kimi tanımağa hazırlaşırdı, bununla bağlı Tramp höküməti rəsmi təklif də irəli sürmüşdü. Ukraynaya dəstək göstərən Avropa ölkələri belə başa düşürlər ki, Ukraynanın əvvəlki sərhədlərinə qaytarılması məsələsi aktual deyil. Hətta sözügedən məsələni Kiyevin özündə də anlayırlar. Rusiya tərəfinin belə bir açıqlama verməsi Amerika-Ukrayna arasında imzalanan mineral ehtiyatların birgə istismarı və İnvestisiyaların Bərpası Fondunun yaradılması haqqında razılaşma ilə bağlıdır. Eyni zamanda Amerika danışıqlardan çıxdığını bildirdi. Bütün bunlar isə Rusiya tərəfində həyacanla qarşılandı. Mineral ehtiyatların birgə istismarı haqqında saziş Ukraynanın təbii sərvətlərinin Amerika tərəfindən mənimsənilməsini nəzərdə tutur. Nəzərə almaq lazımdır ki, Ukraynanın mineral ehtiyatlarının əksəriyyəti hazırda Rusiyanın işğalı altında olan bölgələrdədir. Bu isə deməyə əsas verir ki, Qərb ölkələri və Amerikanın gələcəkdə Rusiyanın nəzarətində olan ərazilərin azad edilməsiylə bağlı tədbir keçirəcəklər. Hazırda Qərb ölkələri və Rusiya arasında Krım müzakirə mövzusu deyil. Ancaq Ukraynanın Şərq vilayətlərinin geri qaytarılması aktualdır. Rusiyanın atəşkəsə razı olmamasının əsas səbəbi budur. Rusiya iddia edir ki, Qərb ölkələri gələcəkdə Ukraynaya Şərq vilayətlərinin işğaldan azad olunması üçün yardım göstərəcəklər”.
