Çili Prezidenti Qabriel Boriç, Braziliyada keçiriləcək BRİKS sammitində iştirak edəcəyini açıqlayıb.
Trend-in məlumatına görə, Boriç bu barədə Braziliya Prezidenti Luiz İnasio Lula da Silva ilə görüşündən sonra keçirilən mətbuat konfransında bildirib.
O, qeyd edib ki, "Braziliya prezidenti keçən il bizə G20 sammitində iştirak etmək dəvəti göndərmişdi və bu il də BRİKS sammitində iştirak edəcəyik".
Yanvarın 1-dən Braziliya BRİKS-ə sədrlik edir. 2024-cü ildə isə assosiasiyaya Rusiya sədrlik edib və bu dövrdə əsas hadisə oktyabrın 22-24-də Kazanda keçirilən sammit olub. Bu sammitdə tərəfdaş dövlətlər kateqoriyasının yaradılması qərarı qəbul edilib və ilk tərəfdaşlar Belarus, Boliviya, Qazaxıstan, Kuba, Malayziya, Tailand, Uqanda və Özbəkistan olub.
İndoneziya əvvəlcə BRİKS-in tərəfdaşı kimi adlandırılsa da, yanvarın 6-da Braziliya hakimiyyəti ölkənin tamhüquqlu üzv olduğunu elan edib. Həmçinin, yanvarın 17-də Braziliya Xarici İşlər Nazirliyi Nigeriyanın BRİKS-ə tərəfdaş kimi qoşulduğunu açıqlayıb.
BRİKS sammiti iyulun 6-dan 7-dək Rio-de-Janeyroda keçiriləcək.
