ABŞ Daxili Təhlükəsizlik Departamenti yüz minlərlə miqranta ölkədə yaşamaq və işləmək icazələrinin ləğv edildiyini və ölkədən getməli olduqlarını bildirən məktub göndərib.
“Report” xəbər verir ki, bu barədə bildirişin surətinə istinadən CNN məlumat yayıb.
Bunlar keçmiş prezident Co Bayden administrasiyasının başlatdığı humanitar proqram çərçivəsində ABŞ-a daxil olan Kuba, Haiti, Nikaraqua və Venesuela vətəndaşlarıdır.
Ümumilikdə, “CHNV” kimi tanınan proqram çərçivəsində 530 000-dən çox insan humanitar yardım alıb.
Proqram iştirakçılarının elektron poçt ünvanlarına göndərilən sənəddə deyilir: “Bununla sizə humanitar giriş icazənizin ləğv edildiyini bildiririk. Əgər ölkəni tərk etməsəniz, sizə qarşı şəxsi məsələləri həll etmək imkanı olmadan həbs və deportasiya daxil olmaqla, icra tədbirləri görülə bilər”.
