Türkmənistanda işgüzar səfərdə olan Ermənistan Prezidenti Vaaqn Xaçaturyan “Dənizə çıxışı olmayan ölkələrin III Konfransı” çərçivəsində İranın vitse-prezidenti Məhəmmədrza Arif ilə görüşüb.
Teleqraf xəbər verir ki, tərəflər görüş zamanı iki ölkə arasında mehriban qonşuluq və çoxsahəli əməkdaşlığın davamlı şəkildə inkişaf etdiyini bildiriblər.
Söhbət zamanı iqtisadiyyat, enerji, infrastruktur, yüksək texnologiyalar və bir sıra digər sahələrdə əməkdaşlığın genişləndirilməsi perspektivlərinə xüsusi diqqət yetirilib. Prezident Xaçaturyan İran şirkətinin Şimal-Cənub avtomobil dəhlizinin Mehri-Qacaran hissəsində həyata keçirdiyi işləri yüksək qiymətləndirərək, onların regional kommunikasiyaların inkişafında əhəmiyyətini qeyd edib.
Tərəflər, həmçinin, ümumi regional vəziyyət və baş verən hadisələrlə bağlı fikir mübadiləsi aparıb.
