Fələstinin HƏMAS hərəkatı Ərəb Dövlətləri Liqası (LAS) və İslam Əməkdaşlıq Təşkilatının (İƏT) Qətərin paytaxtı Dohada keçirilən sammitində İsrailə təzyiq göstərmək üçün beynəlxalq koalisiyanın yaradılması barədə razılıq əldə olunacağına ümid edir.
Teleqraf xəbər verir ki, bu barədə hərəkatın Telegram kanalında qeyd olunub.
"Biz Qəzza zolağında atəşi dayandırmaq üçün təcili tədbirlərin görüləcəyini, o cümlədən üzvləri İsrailə və onun müttəfiqlərinə təzyiq göstərə biləcək beynəlxalq alyansın yaradılmasını gözləyirik", - sənəddə deyilir.
HƏMAS rəhbərliyi həmçinin ərəb liderlərini Ərəb Liqasının Birgə Müdafiə Müqaviləsinin müddəalarını yerinə yetirməyə və İsrailə qarşı hərtərəfli sanksiyalar tətbiq etməyə çağırıb.
"İsrailin Dohaya hücumu sübut edir ki, yəhudi dövlətinin hakimiyyəti atəşkəs və məhbusların qarşılıqlı azad edilməsinə can atmır, əksinə Qətərin vasitəçilik missiyasına mane olmaq istəyir” - deyə məqalədə qeyd olunur.
Qeyd edək ki, sentyabrın 15-də Dohada Ərəb Liqası və İƏT-in fövqəladə sammiti keçiriləcək. Onun çağırılmasına səbəb İsrailin sentyabrın 9-da Fələstin hərəkatının Dohadakı iqamətgahlarından birinə hücumu olub.
