HƏMAS ABŞ-ın atəşkəsin uzadılması və girovların azad edilməsi ilə bağlı yeni planını qəbul etməsə, nəticəsi ağır olacaq.
Bunu İsrail Baş naziri Benyamin Netanyahu deyib.
“Bir şeyi aydınlaşdırmaq istəyirəm - “pulsuz nahar” olmayacaq. Əgər HƏMAS girovlarımızı azad etmədən atəşkəsi davam etdirə və ya birinci mərhələnin şərtlərindən istifadə edə biləcəyini düşünürsə, yanılır”, - Netanyahu bildirib.
Qeyd edək ki, ötən gün İsrail Qəzza sektoruna humanitar yardımların buraxılmasını dayandırıb və bütün keçid məntəqələrini bağlayıb.
Politoloq Samir Hümbətov "Sherg.az"a deyib ki, Donald Trampın irəli sürdüyü layihə HƏMAS tərəfindən qəbul edilməyəcək:
"ABŞ-ın keçmiş prezidenti Donald Trampın İsrail-Fələstin münaqişəsinin həlli üçün təklif etdiyi layihə HƏMAS tərəfindən rədd ediləcək kimi görünür. Münaqişə tərəfləri arasında atəşkəsin imzalanması üçün hazırlanan mərhələli sənəddə əsas məsələlərdən biri əsirlərin qaytarılmasıdır. Lakin prosesin ləngiməsi və ya tamamilə dayandırılması ehtimalı var. Bunun səbəbi, böyük ehtimalla, kənar güclərin HƏMAS-a təsir etməsidir. Əgər, HƏMAS əsirlərin qaytarılması ilə bağlı razılaşmanı tam şəkildə icra etməsə, bölgədə yeni qarşıdurmaların yaranması qaçılmaz olacaq. İsrail bu situasiyanı öz maraqları çərçivəsində qiymətləndirə bilər və hərbi əməliyyatlarını yenidən başlatmaq üçün yeni imkan əldə edər. Bu, xüsusilə İsrail hökumətinin artıq dəfələrlə sərt mövqe nümayiş etdirdiyini nəzərə alsaq, olduqca real bir ssenaridir. İsrailin Baş naziri Benyamin Netanyahu bu məsələyə münasibət bildirərək açıq xəbərdarlıq edib ki, ya razılaşma tam şəkildə həyata keçiriləcək, ya da münaqişə daha genişmiqyaslı qarşıdurmaya çevriləcək".
Politoloq əlavə edib ki, HƏMAS öhdəliklərini yerinə yetirməsə, İsrail bölgədə yeni hərbi əməliyyatlara başlaya bilər:
"Hazırkı vəziyyətdə münaqişənin böyüməsi Yaxın Şərq üçün ciddi fəsadlara yol aça bilər. Artan gərginlik İsrail və HƏMAS arasında qanlı toqquşmaların yenidən baş verməsinə gətirib çıxaracaq ki, bu da bölgədəki siyasi və humanitar vəziyyəti daha da ağırlaşdıracaq. Münaqişənin uzanması beynəlxalq ictimaiyyətin də diqqət mərkəzindədir, lakin indiyə qədər effektiv həll yolu tapılmayıb.
Bütün bu gərgin vəziyyətdə HƏMAS-ın yeganə çıxış yolu girovların azad edilməsi ilə bağlı yeni planın icrasına razılıq verməsidir. Əks halda, İsrailin daha sərt addımlar atacağı və müharibənin miqyasının böyüyəcəyi qaçılmazdır".
