HƏMAS hərəkatı Qəzza zolağında atəşkəs sazişi bağlamağa hazır olduğunu rəsmən təsdiqləyib.
Teleqraf xəbər verir ki, bu barədə hərəkatın liderlərindən biri Abdel Rəhman Şadid Əl-Cəzirə telekanalına verdiyi müsahibədə bəyanatla çıxış edib.
Şadid bildirib ki, HƏMAS İsrail girovlarının fələstinli əsirlərlə mübadiləsinə dair sazişi qəbul etməyə hazırdır və bu istiqamətdə artıq hərtərəfli təkliflərini təqdim edib.
“HƏMAS təsdiq edir ki, o, mübadiləyə dair saziş bağlamağa hazırdır və artıq bununla bağlı hərtərəfli təklifini təqdim edib. Lakin İsrail danışıqların uğuruna mane olur, indi top onların meydanındadır,” - deyə o vurğulayıb.
Bu bəyanat, İsrailin Qəzza zolağına yenidən zərbələr endirməsi fonunda verilib. Qəzzada vəziyyət gərgin olaraq qalır və tərəflər arasında müvəqqəti atəşkəsin əldə olunması üçün vasitəçilərin, xüsusilə Misir və Qətərin iştirakı ilə diplomatik səylər davam edir.
Qeyd edək ki, BMT və ABŞ bölgədə humanitar fəlakətin daha da dərinləşməməsi üçün tərəfləri atəşkəs və əsir mübadiləsinə dair razılaşma əldə etməyə çağırıb.
