İran hava məkanını iyunun 26-sı saat 14:00-dək bağlı saxlamaqla bağlı qərar verib.
AZƏRTAC “Qətər” xəbər agentliyinə istinadla bildirir ki, İranın Yollar və Şəhərsalma Nazirliyinin sözçüsü Məcid Əxvan bildirib ki, bu uzadılma sərnişinlərin və uçuşların təhlükəsizliyini təmin etmək məqsədi daşıyır.
O qeyd edib ki, qərar son hadisələr fonunda verilmiş 19 saylı NOTAM (aviasiya bildirişi) əsasında qəbul olunub və İran hava məkanı göstərilən vaxta qədər bağlı qalacaq.
Əxvan vətəndaşları hava limanlarına getməməyə və uçuşlarla bağlı xəbərləri yalnız rəsmi mənbələrdən izləməyə çağırıb. O, əlavə edib ki, vəziyyət normallaşana qədər tətbiq edilən məhdudiyyətlər qüvvədə qalacaq və fövqəladə hal bitdikdən sonra hava məkanının yenidən açılması rəsmi şəkildə elan olunacaq.
Qeyd edək ki, İran iyunun 13-də İsrailin hücumundan sonra hava məkanını bağlamışdı.
