Əhməd əş-Şara da (Colani) Bin Laden və Əbu Bəkr əl-Bağdadinin taleyini yaşayacaq. Bu proqnozu yadda saxlayın və ciddi qəbul edin.
Bu, Əli Xameneinin ofisinə bağlı olan “Keyhan” qəzetinin baş redaktoru Hüseyn Şəriyətmədari yazıb.
“Bin Laden və Əbu Bəkr Bağdadi kimi muzdluların karyerasının sonu açıq şəkildə göstərir ki, təkfirçi terrorçular ABŞ tərəfindən yaradılıb. Birləşmiş Ştatlar təkfirçilərin vəhşi cinayətlərinin məsuliyyətini öz üzərinə götürməmək üçün bu qruplardan istifadə etdikdən sonra liderlərini aradan götürür!”- o bildirib.
Qeyd edək ki, “Keyhan”ın baş redaktoru Hüseyn Şəriətmədari birbaşa Əli Xameneinin göstərişi ilə bu vəzifəyə təyin olunub və burada gedən yazılar İranın rəhbəri Əli Xameneinin başçılıq etdiyi mühafizəkar qanadın - SEPAH və ETTELAAT-ın mövqeyini əks etdirir.
Politoloq Samir Hümbətov "Sherg.az"a deyib ki, İran tərəfi bu cür, hətta daha sərt açıqlamalar verməyə davam edəcək:
"Suriyada baş verən dəyişikliklərdən sonra İranda ciddi narazılıq və narahatlıqlar yaranıb. Çünki belə vəziyyətdə əksər hallarda mövcud rejimi günahlandırırlar. Məhz Xameneinin ofisindən sözügedən bəyanatın gəlməsi çox böyük siqnaldan xəbər verir. Əslində Hüseyn Şəriətmədari məlum məsələdə o qədər də nüfuzlu şəxs deyil. Onun açıqlaması İran daxilində etirazçı kütlənin başını qatmaq, manipulyasiya etmək üçün ən optimal variantdır. Nəzərə almaq lazımdır ki, bu gün Əş-Şəra hökuməti daha çox Türkiyənin himayədarlığından yararlanır. Bu mənada Suriya hakimiyyəti hətta ABŞ-ın belə öz ərazisində qoşun saxlamamasının tərəfdarıdır. Ola bilər ki, buradakı YPG kimi qruplaşmaları Vaşinqton dəstəkləyir. Lakin bu, Əş-Şəranın himayə edilməsi demək deyil. Ümumiyyətlə İran xalqının Suriyaya xərclənən pulların qarşılığında nə qədər qoşunun qırılması ilə bağlı suallarına Tehranın cavabı olmalı idi. Xameneinin sözçüsü də bu açıqlamanı verərək demək istəyirlər ki, biz əlimizdən gələni etdik, lakin günah ABŞ-dadır".
