İsrail hərbi qüvvələri Suriyanın cənubundakı Dəra əyalətinə daxil olublar.
Teleqraf xəbər verir ki, bu barədə Suriyanın “Al Ikhbaria” telekanalı məlumat yayıb.
Kanal bildirib ki, İsrail qüvvələri səhər saatlarında Dəranın qərbindəki Abdin kəndinin kənarında görünüb. İsrail hərbçiləri Əl-Arid bölgəsinə çatıb və orada nəzarət-buraxılış məntəqəsi qurub.
Suriya televiziyasının dünən verdiyi bir başqa məlumata görə, İsrail ordusunun patrulu ölkənin Quneytra əyalətinə daxil olub və Əl-Müəlləqa kəndində təmizlik işləri aparıb. Telekanal qeyd edib ki, İsrail qüvvələri son vaxtlar tez-tez Suriya ərazisinə hücum edir, yerli sakinləri saxlayır və onların evlərində axtarışlar aparır.
Sentyabrın 22-də Suriya Prezidenti Əhməd Şaraa BMT Baş Assambleyasının 80-ci sessiyası çərçivəsində bəyan edib ki, Dəməşq və Təl-Əviv təhlükəsizlik tədbirləri ilə bağlı razılığa gələ bilər, amma İsrail qüvvələri istənilən halda Suriya ərazisindən çıxmalıdır.
