Qəzza zolağında atəşkəs razılaşması çərçivəsində israilli girovların azad edilməsi prosesi başlayıb. Belə ki, Fələstinin "İslami Cihad" hərəkatı bu gün azad edilməsi planlaşdırılan girovlardan ikisini müttəfiqlərinə təhvil verib.
Oxu.Az-ın məlumatına görə, bu barədə təşkilatın hərbi qanadı olan "Saraya al-Quds" ("Qüds Briqadaları") qruplaşmasının "Telegram" kanalında bəyan edilib.
"İsrailli girovlar Arbel Yehudla Qadi Mozes müttəfiqlərə təhvil verilib və bu gün (30 yanvar, cümə axşamı - red.) İsraillə razılaşma çərçivəsində azad ediləcəklər", - deyə sənəddə qeyd olunur.
Xatırladaq ki, İsraillə HƏMAS arasında atəşkəs yanvarın 19-da qüvvəyə minib. Dünən xəbər verilmişdi ki, İsrail tərəfi Qəzza zolağında atəşkəs razılaşması çərçivəsində yanvarın 30-da radikallar tərəfindən azad edilməli olan girovların siyahısını alıb.
