İtaliyada bəzi nazirliklərin və dövlət qurumlarının saytları kiberhücumlara məruz qalıb.
AZƏRTAC xəbər verir ki, İtaliyanın şirkətləri və “Made in Italy”, Daxili İşlər və Maliyyə Nazirliklərinin bəzi saytları, eləcə də Maliyyə Polisinin saytının rusiyapərəst hakerlərin kiberhücumlarına məruz qaldığı bildirilir. Həmin saytlar “NoName057” haker qrupunun kiberhücumlarından zərər çəkib.
İtaliya Milli Kibertəhlükəsizlik Agentliyi kiberhücumlara məruz qalan qurumların saytlarının funksional fəaliyyət göstərməsi üçün lazımi dəstək göstərib. Daha əvvəl Milanın Malpensa və Linate aeroportlarının, Taranto və Trieste limanlarının, həmçinin “Monte Paschi” və “Intesa San Paolo” banklarının, bəzi İT şirkətlərinin və özəl qurumların saytları rusiyapərəst hakerlərin kiberhücumlarına məruz qalmışdı.
Xatırladaq ki, Ukrayna Prezidenti Volodimir Zelenskinin yanvarın 9-da Romaya səfəri zamanı da İtaliyanın bəzi dövlət qurumlarının saytlarına kiberhücumlar olmuşdu.
