2024-cü ildə keçirilən ABŞ seçkilərində Demokrat Partiyasının namizədi Kamala Harrisin Donald Trampa niyə uduzduğu sualı partiya tərəfindən hələ də araşdırılır.
Sherg.az xəbər verir ki, "Axios"un xəbərinə görə, Demokrat Partiyasının rəsmiləri seçki təhlili hazırlayıblar. Hələ ictimaiyyətə açıqlanmayan 2024-cü il seçki təhlilinə əsasən, Kamala Harrisin seçkini uduzmasında Qəzzanın işğalına münasibəti mühüm rol oynayıb.
Demokratik Milli Komitə (DMK) çərçivəsində aparılan və “məxfi” saxlanılan araşdırmada İsrail–Qəzza siyasətinin seçki nəticələri baxımından “açıq şəkildə mənfi” amil olduğu qeyd edilir. Partiya rəhbərliyinin bu hesabatı daxildə ciddi parçalanmaya səbəb ola biləcəyi narahatlığı ilə ictimaiyyətdən gizlətdiyi bildirilir. Tapıntıların xüsusilə gənclər və “mütərəqqi” seçicilər arasında dəstəyin azalmasına səbəb olduğu vurğulanır.
DMK rəsmilərinin Fələstin tərəfdarı Yaxın Şərqi Anlama İnstitutu (IMEU Politika Layihəsi) fəalları ilə qapalı görüşündə, administrasiyanın İsrailə verdiyi dəstəyin Harrisin səs faizinə zərər vurduğu qeyd edilib.
Harris seçki kampaniyası müddətində İsrailə dəstək ilə Qəzza üçün atəşkəs çağırışı arasında balans yaratmağa çalışsa da, xatirələrini qələmə aldığı “107 Gün” adlı kitabında dövrün ABŞ Prezidenti Co Baydenin İsrailin Baş naziri Netanyahuya verdiyi “açıq çekin” ona zərər verdiyini bildirib. Harris həmçinin administrasiya olaraq İsrailin müharibəni aparma üsuluna dair tənqidlərini ictimaiyyət qarşısında daha açıq ifadə etməli olduqlarını qeyd edib.
Yaxın Şərqi Anlama İnstitutu Politika Layihəsi Demokratik Milli Komitəni hesabatın İsraillə bağlı nəticələrinə görə onu dərc etməməkdə ittiham edib. DMK sözçüsü isə hesabatın seçki yönümlü işlərə mane olmaması üçün paylaşılmadığını müdafiə edib.
Harris kitabında Qəzzadakı mülki əhali üçün daha çox empati göstərilməsi məsələsində Baydenə şəxsi şəkildə “yalvardığını”, lakin kampaniya prosesində ictimaiyyət qarşısında prezidentlə zidd mövqedə çıxış etmədiyini yazıb. Partiya rəsmiləri bu araşdırmadan əldə edilən məlumatların aralıq seçkilər ərəfəsində namizədlərlə aparılan strateji müzakirələrə inteqrasiya edildiyini bildiriblər.
