ABŞ Prezidenti Donald Trampın administrasiyası Fələstin HƏMAS hərəkatına Qəzza zolağında İsraillə əldə olunmuş 60 günlük atəşkəs müddəti başa çatdıqdan sonra hərbi əməliyyatların yenidən başlanmayacağına dair zəmanət verib.
Teleqraf xəbər verir ki, bu barədə "Sky News Arabia" telekanalı məlumat yayıb.
Məlumata görə, HƏMAS və İsrail arasında Qətərin paytaxtı Dohada aparılan dolayı danışıqlarda tərəflər atəşkəslə bağlı razılığa yaxınlaşıblar.
Bildirilir ki, yeganə həll olunmamış məsələ İsrail ordusunun Qəzzadakı mövcudluğu və statusu ilə bağlıdır. Tərəflər humanitar yardımın Qəzzaya çatdırılması prosesi və HƏMAS-ın ABŞ-dən tələb etdiyi atəşkəsin davamlılığına dair zəmanət kimi məsələlərdə ciddi fikir ayrılıqlarını aradan qaldırıblar.
Qeyd edək ki, iyulun 6-da Misir, Qətər və ABŞ-nin vasitəçiliyi ilə HƏMAS və İsrail arasında danışıqlar yenidən başlayıb. Məqsəd – Qəzza zolağında davamlı atəşkəsə nail olmaq və orada saxlanılan israilli girovların azad edilməsidir.
ABŞ Prezidentinin Yaxın Şərq üzrə xüsusi nümayəndəsi Stiven Uitkoff bu həftə Ağ Evdə keçirilən iclasda bildirib ki, Vaşinqton yaxın günlərdə atəşkəslə bağlı razılaşmanın əldə olunacağına ümid edir.
