Fəthullahçı Terror Təşkilatının (FETÖ) lideri Fəthullah Gülənin Türkiyədə rəsmi sənədlərdə sağ olduğu görünür.
Teleqraf xəbər verir ki, bu barədə Türkiyə KİV məlumat yayıb.
1999-cu ildə ABŞ-yə gedən F.Gülən 2024-cü il oktyabrın 20-də Pensilvaniya ştatında vəfat edib və orada dəfn olunub.
Türkiyənin kəşfiyyat mənbələri və Xarici İşlər Nazirliyi FETÖ liderinin ölümünü təsdiqləyib. Buna baxmayaraq, müvafiq orqanlara rəsmi müraciət olunmadığı üçün Fəthullah Gülən rəsmi sənədlərdə sağ hesab olunur. Ailəsi və FETÖ bununla bağlı heç bir tədbir görməyib.
Türkiyə Daxili İşlər Nazirliyinin Əhali Məsələləri Baş İdarəsinin saytında yer alan məlumata görə, xaricdə olarkən vəfat edən ölkə vətəndaşları barədə müvafiq orqanlardan əldə olunan məlumat və sənədlər yaxınları tərəfindən xarici nümayəndəliklərə təqdim edilməlidir. Ölüm haqqında şəhadətnamə əsasında xarici nümayəndəliklər tərəfindən ailə reyestrində müvafiq şəxsin öldüyü qeyd olunur. Bu prosedur indiyədək ötən il vəfat edən F. Gülənlə bağlı həyata keçirilməyib.
