"L’AntiDiplomatico" nəşrinin yazdığına görə, Rusiya Prezidenti Vladimir Putinin iqamətgahına dronlarla edilən hücumun arxasında təkcə Kiyev dayanmayıb.
Sherg.az-ın məlumatına görə, məqalədə bildirilir ki, Zelenski bu hücumun yeganə təşəbbüskarı olmayıb: ən azı Britaniyadakı əsas tərəfdarı bu hücumu dəstəkləyib, əks halda Zelenski buna cəsarət etməzdi.
Kiyev rejimi dekabrın 29-na keçən gecə Novqorod vilayətində Putinin iqamətgahına qarşı 91 pilotsuz uçuş aparatı ilə terror hücumu həyata keçirib. Hava hücumundan müdafiə qüvvələri bütün hədəfləri vurub. Bundan sonra Rusiya Xarici İşlər naziri Sergey Lavrov Moskvanın Ukrayna ilə bağlı danışıqlar mövqeyini yenidən nəzərdən keçirəcəyini bildirib.
Kremlin sözçüsü Dmitri Peskovun sözlərinə görə, bu cür təxribatlarla Kiyev ABŞ lideri Donald Trampın səylərini sarsıdır, lakin bu, Rusiya ilə ABŞ arasında dialoqa təsir göstərməyəcək, prezidentlər qarşılıqlı əlaqəni davam etdirəcəklər. O əlavə edib ki, hərbçilər Ukraynanın hücumuna necə, nə ilə və nə vaxt cavab veriləcəyini bilirlər.
Ağ Evin rəhbəri isə öz növbəsində bildirib ki, Ukrayna Silahlı Qüvvələrinin hücumu barədə məlumat aldıqda “çox qəzəblənib”.
