“Ukrayna yüz minlərlə insanı itirirsə də, çıxılmaz vəziyyətdə qaldı .Bir tərəfdən ABŞ-ın dəstəyi olmadan müharibədə tarazlığı əldən vermək, daha çox torpaq, can və enerji itirmək, hətta ölkəsinin tamamilə işğal etmək riski var. Digər tərəfdən isə ABŞ-ın dəstəyini alarsa, ölkənin resurslarını və strateji obyektlərini Vaşinqtona uduzacaq. Çünki Tramp Ukraynanın mineral, təbii qaz ehtiyatları və ən azı 500 milyard dollar dəyərində strateji obyektlərinin ABŞ qanunlarına uyğun istifadə olunmasını istəyir”.
Bu sözləri "Sherg.az"a açıqlamasında türk hərbçi və təhlükəsizlik mütəxəssisi Abdullah Ağar bildirib.
O, qeyd edib ki, ABŞ Konqresinin qəbul etdiyi “5” Ukrayna paketinin ümumi məbləği 175 milyard dollardır. Bunun da 70 milyard dolları ABŞ-da silah istehsalına xərclənib:
“Deməli, Trampın dediyi 300 milyard dollar ağıla sığmaz rəqəmdir. Digər tərəfdən, ABŞ Ukrayna müharibəsinə görə Aİ-yə dəhşətli satışlar edərək, Rusiya və Avrasiyaya qarşı qeyri-adi geosiyasi üstünlük və təşəbbüs qazanıb. Həmçinin qlobal hökmranlığı üçün lazım olan resurslar naminə NATO ölkələrinin müdafiə xərclərini əvvəlcə iki, sonra isə üç dəfə artıraraq Rusiya üzərində mənəvi üstünlük əldə etdi. Tramp ən azı 500 milyard dollar istəyir. Amma maraqlısı odur ki, rusların sızdırdığı sənədə və digər təfərrüatlara nəzər salsanız, Trampın baxışlarının xeyli yüksək olduğunu görə bilərsiniz. Bəzi xarici mənbələr Ukraynanın qiymətli metalları və karbohidrogen ehtiyatlarının 26 trilyon dollar dəyərində olduğunu təxmin edir. Qəribə deyilmi?
Ukraynada vaxtilə nüvə silahı var idi. Əslində o, dünyanın ən böyük nüvə güclərindən biri idi. Sonra Budapeşt Memorandumunu imzaladı. Bununla da Ukrayna ABŞ, Böyük Britaniya və Rusiyanın verdiyi geosiyasi təhlükəsizlik zəmanətlərini qəbul edərək, nüvə qabiliyyətini və çəkindirici qüvvəsini öz əlləri ilə məhv etdi. Əslində, sözü o tərəf, bu tərəfə çəkməyə ehtiyac yoxdur. O, həm daxildən, həm də xaricdən manipulyasiya edildi, yığışdırıldı və ölkənin nüvə qabiliyyəti əlindən alındı. Və bu nəticələr ortaya çıxdı. Ukraynanın bu gün yaşadıqları digər ölkələr üçün dərs olmalıdır”.
