“Ukrayna Prezidenti Volodimir Zelenski sülh istəyini nümayiş etdirmək üçün mayın 15-də Türkiyənin İstanbul şəhərində rusiyalı həmkarı Vladimir Putinlə görüşməyə razılaşıb”.
Teleqraf xəbər verir ki, bunu Ukrayna Prezident Aparatı rəhbərinin köməkçisi Sergey Leşşenko deyib.
“Ukrayna gedəcək və diplomatik yola hazır olduğunu göstərəcək. Putin gəlməsə, zəifliyini göstərəcək”, - Ukrayna rəsmisi bildirib.
Leşşenkonun sözlərinə görə, top Rusiyanın meydançasındadır:
“Yavaş-yavaş öz tələlərinə düşürlər. Ötən həftə Türkiyədə bizi gözlədiklərini deyəndə bizim üçün tələ quracaqlarını düşünürdülər”.
Prezident Aparatı rəhbərinin köməkçisi artıq Zelenskinin İstanbula gedəcəyini bəyan etdiyini xatırladıb:
“İndi Putin sözünü deməlidir. Maraqlıdır: Kremldəkilər vəziyyətdən necə çıxacaqlar? Bəlkə də Putin “xəstələnəcək”.
Xatırladaq ki, Rusiya Prezidenti mayın 11-də mətbuat konfransında Türkiyədə Ukrayna ilə danışıqları bərpa etməyə hazır olduqlarını açıqlayıb. Putinə cavab verən Zelenski mayın 15-də İstanbulda onu şəxsən gözlədiyini bildirib.
