Rusiya Prezidenti Vladimir Putin və Azərbaycan Prezidenti İlham Əliyev oktyabrın 7-də müsbət və konstruktiv telefon danışığı zamanı görüşmək barədə razılığa gəliblər.
APA-nın Moskva müxbiri xəbər verir ki, bunu Kremlin mətbuat katibi Dmitri Peskov bildirib.
O vurğulayıb ki, Kreml görüşə nikbin baxır və prezidentlər problemli məsələləri müzakirə edəcəklər.
"Hazırda biz Putinin Tacikistana dövlət səfərindən danışırıq. Bizim çox geniş gündəliyimiz var. Əlbəttə ki, ayrıca olaraq Rusiya-Azərbaycan münasibətləri məsələsidir. İki prezidentin bu gün görüşəcəyi ilə bağlı razılıq əldə olunub. Biz bu görüşün nəticələrinə baxacağıq. Biz bu baxımdan nikbinik. Ümid edirik ki, prezidentlər ikitərəfli münasibətlərimizin hazırkı vəziyyətini müzakirə edəcək və mövcud problemli məsələlər barədə danışacaqlar", - Kreml sözçüsü bildirib.
O əlavə edib ki, Putinlə Əliyev arasında oktyabrın 7-də baş tutan telefon danışığı "yaxşı, müsbət və konstruktiv" olub və bu gün keçiriləcək görüşlə bağlı razılıq məhz həmin söhbət zamanı əldə olunub.
Qeyd edək ki, Kremlin açıqladığı məlumata görə, bu gün Tacikistanın paytaxtı Düşənbədə Azərbaycan prezidenti İlham Əliyevlə Rusiya prezidenti Vladimir Putin arasında ikitərəfli görüş keçiriləcək.
