Amerikalı milyarder və "SpaceX"in rəhbəri İlon Mask 2022-ci ildə Ukrayna Silahlı Qüvvələrinin əks-hücum əməliyyatını dayandırmaq üçün Starlink peyk internetinin söndürülməsi barədə göstəriş verib.
Teleqraf xəbər verir ki, bu barədə "Reuters" agentliyi məsələ ilə mənbələrə istinadən məlumat yayıb.
Məlumata görə, Mask "SpaceX"in Kaliforniyadakı baş mühəndisinə Xerson bölgəsi də daxil olmaqla, bir neçə ərazidə Starlink əhatə dairəsinin deaktiv edilməsini əmr edib. Şirkətin mühəndislərindən Michael Nicholls həmkarlarına bu tapşırığı belə izah edib: “Biz bunu etməliyik".
Agentliyin yazdığına görə, bu qərar Ukrayna hərbçiləri arasında çaşqınlığa səbəb olub. Əlaqənin kəsilməsi nəticəsində pilotsuz uçuş aparatlarının fəaliyyəti dayanıb, artilleriya bölmələri isə "Starlink"in köməyi ilə hədəf yönləndirməkdə çətinlik çəkib.
"Reuters"ə danışan mənbələr qeyd edib ki, bu əmr bəzi "SpaceX" əməkdaşlarını şoka salıb və döyüş bölgəsində ciddi taktiki dəyişikliklərə səbəb olub. Onlar Maskın bu addımı ilə “münaqişənin nəticəsini öz əlinə almağa cəhd etdiyini” vurğulayıblar.
Bildirilib ki, qərarın arxasında Maskın nüvə müharibəsi qorxusu dayanıb. Mənbələrə görə, milyarder Ukraynanın əks-hücumunun Rusiyanı nüvə cavabı verməyə təhrik edə biləcəyindən ehtiyat edirmiş.
