Dəməşqdəki faktiki hakimiyyət Bəşər Əsədi ələ keçirməklə onu cəzalandırmaq və gələcəkdə yarana biləcək "mühacirətdə hökumət" iddiasının qarşısını almaq niyyətindədir
Rusiya xarici işlər nazirinin müavini Mixail Boqdanovun başçılıq etdiyi nümayəndə heyəti yanvarın 28-də Suriyaya səfər edib. Səfər çərçivəsində Boqdanov Suriya administrasiyasının rəhbəri Əhməd əl-Şara ilə görüşüb. Görüş barədə “Reuters“ mənbələri iddia edir ki, danışıqlar zamanı Əhməd əl-Şaraa Rusiyadan keçmiş prezident Bəşər Əsədi yerli hakimiyyətə təhvil verməyi tələb edib.
Suriyanın SANA xəbər agentliyi isə bu gün bildirib ki, Dəməşq Rusiyadan “təzminat, yenidənqurma və bərpa işləri” təmin etməyi, həmçinin “keçmiş səhvləri nəzərə almağı və Suriya xalqının iradəsinə hörmət etməyi” tələb edib.
Mövzu ilə bağlı "Sherg.az"a danışan Türkiyənin Yıldız Texniki Universitetinin müəllimi, professor Mehmet Akif Okur deyib ki, hazırkı Suriya hökuməti "faktiki hökumət" hesab olunur və beynəlxalq ictimaiyyət tərəfindən də bu statusda qəbul edilir:
"Beynəlxalq təcrübədə, faktiki hökumətlər eyni dövlət üzərində alternativ bir idarəetmə iddiası olmadıqda rəsmi tərəfdaş kimi tanınır. Əks halda, müxtəlif dövlətlərin fərqli münaqişə tərəfləri olan hökumətlərlə əlaqə qurmaq ehtimalı yaranır ki, bu da tarixi nümunələrdə müşahidə edilib. Dəməşqdəki faktiki hakimiyyət Bəşər Əsədi ələ keçirməklə onu cəzalandırmaq və gələcəkdə yarana biləcək "mühacirətdə hökumət" iddiasının qarşısını almaq niyyətindədir. Rusiya isə Dəməşqdəki faktiki hökumətə nə dərəcədə etibar edə biləcəyini qiymətləndirir. Hazırkı mərhələdə Əsədin təslim edilməməsi ehtimalı daha güclü görünür".
