Rusiya və Ukrayna arasındakı müharibə dünya gündəmində önəmli yer tutmaqda davam edir. Müharibənin gedişi, həm regional, həm də beynəlxalq səviyyədə ciddi nəticələrə yol açıb. ABŞ və digər dünya gücləri bu münaqişənin həlli üçün müxtəlif diplomatik səylər göstərsələr də, hələ də konkret nəticə əldə edilməyib. ABŞ prezidenti Donald Trampın hakimiyyətə gəldikdən sonra Rusiya ilə bağlı yeni diplomatik təmaslar barədə açıqlamaları, müharibənin dayandırılmasına dair ümidləri artırsa da, bu prosesin necə davam edəcəyi və hansı tərəflərin kompromisə getməli olacağı hələ də qeyri-müəyyəndir. Trampın Ukrayna üzrə nümayəndəsi Kit Kelloqun münaqişənin dayandırılması ilə bağlı Ukraynaya səfəri də müharibənin gələcək taleyini müəyyən etmək baxımından əhəmiyyətli bir addım olaraq qiymətləndirilir.
Mövzu ilə bağlı politoloq Elşad Həsənov "Sherg.az"a açıqlamasında Trampın hakimiyyətə gələndən sonra verdiyi müsahibələrə diqqət çəkib:
"Tramp hakimiyyətə gələndən sonra bidirdi ki, bizim Rusiya ilə bu sahədə danışıqlarımız gedir. Yaxın zamanlarda Putinlə danışacağını və görüşəcəyini söylədi. Görünən odur ki, ABŞ əvvəlcə Ukraynaya köməyi dayandırdı ancaq sonradan silah-sursat yardımını yenidən bərpa etdi.
Trampın Ukrayna üzrə nümayəndəsi, özünün şəxsi dostu Kit Kelloq fevralın 14-16-da Ukraynada olacaq. Səfər zamanı müharibənin dayandırılması yolları müzakirə ediləcək. Əvvəl deyirdilər ki, müharibə qısa müddətdə dayandırılacaq. Kit Kelloqun bildirdiyinə görə isə bu proses 100 gün müddətində baş tutacaq. Bu da haradasa aprelin sonu, mayın əvvəllərinə təsadüf edir.
Belə bir iddia da deyilmişdi ki, Rusiya-Ukrayna müharibəsi məhz Böyük Vətən müharibəsinin 80 illiyində dayandırılsın. Rusiya da sanki bunu Ukrayna üzərində qələbəni əldə etmiş kimi öz xalqına sırıya bilsin".
Ekspert artıq Rusiyanın həm iqtisadi, həm də hərbi cəhətdən taqətdən düşdüyünü söyləyib:
"Rəsmi Moskva da son günlər müharibəni dayandırmağa razı olduqlarını bildirir. Putin öz müsahibələrinin birində söylədi ki, Zelenski legitim prezident deyil və biz onunla danışıq aparmalı deyilik. Ancaq son günlər Rusiya Federasiyası Prezidentinin mətbuat katibi Dmitri Peskov Zelenski ilə danışıqlara hazır olduqlarını bildirdi.
Rusiya-Ukrayna müharibəsi mütləq dayandırılmalıdır. Çünki insan resursları tükənir, çoxlu ölənlər, yaralananlar var. Həm də bu, iqtisadi cəhətdən hər iki ölkəni də pis vəziyyətə salıb. Avropada da, ABŞ-da da çətin vəziyyət yaranıb. Ona görə də müharibənin may ayına kimi dayanması, atəşkəs elan edilməsi və sonra da bunu tamam dayandırmaq haqqında sülh müqaviləsi barəsində planlar işə düşəcək".
Elşad Həsənov sonda Rusiyanın ABŞ-nin hazırladığı planlara hazır olmasa, müharibənin qısa müddətdə daha da şiddətlənə biləcəyini vurğulayıb.
