Əgər ABŞ Prezidenti Donald Tramp Ukrayna və Rusiyanı danışıqlar masasına gətirə bilsə, Kiyev Kursk vilayətində ələ keçirilən torpaqlardan imtina edərək Moskvaya birbaşa ərazi mübadiləsi təklif edə bilər.
Bunu Ukrayna Prezidenti Vladimir Zelenski “Quardian”a müsahibəsində deyib.
"Biz bir ərazini digərinə dəyişə bilərik", - deyə o bildirib.
Zelenski Ukraynanın Rusiyanın işğal etdiyi ərazilərin hansı hissəsinin müqabilində tələb edəcəyini hələlik bilmədiyini vurğulayıb.
Politoloq Aqşin Kərimov "Sherg.az"a deyib ki, Donald Trampın Rusiya-Ukrayna müharibəsinin tənzimlənməsi ilə bağlı səyləri kifayət qədər parlaq görünməkdədir:
"Trampın müharibənin yekun həllinin necə olacağına dair planının dəqiq təfərrüatları gün işığına çıxmayıb. Ən azından beynəlxalq ictimaiyyətdə müzakirələr zamanı bunun detalları açıqlanmır. Bununla belə, bəzi istiqamətlər ABŞ Prezidentinin hansı niyyətdə olduğunu göstərir. Tramp, Ukraynanın zəngin sərvətlərinin yerləşdiyi ərazilərdə ABŞ-nin iqtisadi mülkiyyətini qurmağa çalışır. Əgər ABŞ-Rusiya danışıqları baş tutsa, Ağ Ev həmin sərvətlərin istismarını güzəşt predmeti kimi Ukraynanın qarşısına qoyacaq. Rəsmi Kiyev bunu qəbul edərsə, Tramp Putinlə həmin məsələni müzakirə mövzusuna çevirə, o cümlədən Rusiya ilə birgə həmin sərvətlərin siyahısını hazırlaya bilər. ABŞ Prezidenti münaqişənin həllində Vaşinqtonun iqtisadi yükünü azaltmaqda israrlı görünür. Bununla belə, ABŞ-nin hegemoniyasını təmin etmək Donald Trampın əsas prioritetlərindən biridir. Sadəcə o, demokratlardan fərqli olaraq, alternativ yollarla bunu təmin etmək istəyir. Ukraynanın Kurskda tutduğu ərazilərin qaytarılması müqabilində isə Rusiyanın Ukrayna torpaqlarından geri çəkilməsi real deyil. Çünki Rusiya qoşunlarının Ukraynada kifayət qədər böyük irəliləyişləri qeydə alınır. Hərçənd ki, bu, indiki halda taktiki nailiyyətlərdir. Strateji nailiyyət isə o vaxt mümkün olacaq ki, Kreml Ukraynanı öz tələbləri kontekstində danışıqlar masasına gətirərək kapitulyasiya imzalamağa məcbur edəcək".
Politoloqun fikrincə, Vladimir Zelenski bu məsələdə Rusiyaya qarşı mümkün qədər dirəniş nümayiş etdirir. Bu isə Ukraynanın taleyini həll edən açar deyil:
"Ölkənin taleyi Rusiya-ABŞ mübarizəsi çərçivəsində müəyyən olunacaq. Həmçinin Şimali Koreya, Cənubi Koreya kimi Asiya güclərinin müharibəyə poyeksiyası mövcuddur. Başqa yandan isə digər dünya gücü Çinin Ukraynadakı maraqları və münaqişənin tənzimlənməsindəki diplomatik səyləri gözardı edilməməlidir. Ona görə də Ukraynanın taleyi çoxtərəfli mübarizə kontekstində Rusiya, Çin və ABŞ-nin yekun danışıqlar masasında hansı nəticələr əldə edə biləcəyi ilə mütənasib olacaq".
