Myanma ordusu ötən ay istefada olan briqada generalı və diplomatın öldürülməsinə görə "terrorçular" adlandırdığı qruplaşmanın tərkibində altı yaşlı uşağı həbs ediblər.
Oxu.Az bu barədə "Reuters"ə istinadən məlumat verir.
Məlumata görə, istefada olan briqada generalı, eyni zamanda səfir olan 68 yaşlı Ço Htun Aunq mayın 22-də Myanmanın ticarət paytaxtı Yanqonda güllələnərək öldürülüb. Bu da artan vətəndaş müharibəsi fonunda ölkədə ən səs-küylü qətllərdən birinə çevrilib.
Qeyd edək ki, Myanmada hərbçilərin 2021-ci ilin fevralında çevrilişlə hakimiyyəti ələ keçirməsindən, Nobel mükafatı laureatı Aun San Su Çjinin başçılıq etdiyi seçilmiş hökuməti devirməsindən və kütləvi etirazlara səbəb olmasından bəri ölkədə iğtişaşlar hökm sürür.
Müxalif fikrin qəddar şəkildə boğulması misligörünməmiş ümummilli üsyana gətirib çıxarıb. Hətta Yanqon kimi şəhər rayonlarında da partizan döyüşləri başlayıb.
"13 kişi və üç qadın olmaqla, ümumilikdə 16 cinayətkar həbs edilib", - deyə "Global New Light of Myanmar" qəzeti yazıb.
Qəzet qatilin qızı kimi identifikasiya edilən altı yaşlı uşağın şəklini də dərc edib. "Reuters" tərəfindən görülən qəzetin onlayn versiyasında uşağın üzü bulanıq olub, lakin xunta rəsmiləri tərəfindən sosial şəbəkələrdə edilən paylaşımlarda aydın görünüb.
Xatırladaq ki, mayın 22-də "Qızıl vadi döyüşçüləri" üsyançı qrupu təqaüdçü generalı Ço Htun Aunqu dinc sakinlərə hücumlar da daxil olmaqla, hərbi əməliyyatlara davamlı dəstəyinə görə öldürdüyünü bəyan edib.
