ABŞ Müdafiə Naziri Pit Hegsetin İsrailə səfəri və Prezident Donald Trampın Yaxın Şərq turu ilə bağlı son məlumatlar yayılıb.
APA xəbər verir ki, bu barədə Axios portalı İsrail rəsmiləri arasında olan mənbələrə istinadən məlumat yayıb.
ABŞ Müdafiə Naziri Pit Hegsetin 12 may 2025-ci ildə İsrailə səfəri planlaşdırılır. Bu, onun müdafiə naziri kimi İsrailə ilk səfəri olacaq. Səfər çərçivəsində Hegsetin İsrailin Baş naziri Benyamin Netanyahu və Müdafiə Naziri İsrael Katz ilə görüşləri nəzərdə tutulub. Bu görüşlərdə İranın nüvə obyektlərinə qarşı mümkün hərbi tədbirlər, Qəzzadakı vəziyyət və Yəməndəki ABŞ hərbi əməliyyatları kimi məsələlərin müzakirə olunacağı gözlənilir .
Prezident Donald Trampın 13-16 may 2025-ci il tarixlərində Səudiyyə Ərəbistanı, Qətər və Birləşmiş Ərəb Əmirliklərinə səfəri planlaşdırılır. Səfər zamanı Trampın Səudiyyə Ərəbistanının vəliəhdi Məhəmməd bin Salman tərəfindən təşkil olunacaq Körfəz Əməkdaşlıq Şurasının liderləri ilə sammitdə iştirak edəcəyi gözlənilir. Sammitin əsas mövzuları müdafiə əməkdaşlığı, investisiyalar və süni intellekt sahəsində əməkdaşlıq olacaq.
