Çin bir il ərzində özünün nüvə arsenalını 100 başlıq artırıb. Hazırda Çinin 600-dən çox nüvə başlığı var.
Bu barədə Stokholm Beynəlxalq Sülh Araşdırmaları İnstitutu məlumat yayıb.
Məlumata görə, 2025-ci ildə Çinin nüvə başlıqlarının sayı Böyük Britaniya və Fransanın birlikdə malik olduqlarından artıq olub.
Pekin öz arsenalını dünyanın digər ölkələrindən daha sürətlə genişləndirir.
SIPRI bildirib ki, 2023-cü ildən etibarən Çin hər il təxminən 100 yeni nüvə başlığı toplayır. Bu, ölkənin nüvə potensialının əhəmiyyətli dərəcədə artdığını göstərir.
Hazırda Çin nüvə başlıqlarının sayına görə yalnız üçüncü yeri tutur - Rusiyaya (5459 ədəd) və ABŞ-ə (5177 ədəd) uduzur.
Qeyd edilib ki, Rusiya və ABŞ dünyada mövcud olan nüvə silahlarının təxminən 90 faizinə sahibdir.
Hesabatda həmçinin bildirilib ki, 2025-ci ildə dünyada ümumi nüvə başlıqlarının sayı 12241-ə çatıb. Halbuki 2024-cü ildə bu rəqəm 12405 olub.
Politoloq Oqtay Qasımov Sherg.az-a deyib ki, Çin artıq dünyada ikinci qlobal güc mərkəzi kimi formalaşır:
"Bu, iqtisadi güclə bərabər siyasi geopolitik ambisiyaları önə gətirir. Son dövrlər biz Çinin fəal aktiv xarici siyasət yeritdiyini və beynəlxalq geopolitik mübarizədə ciddi rol aldığını görürük. Nüvə başlıqlarına sahib olmaq həm təhlükəsizlik çətirini təşkil edir, həm də supergüc iddiasını bir az da möhkəmləndirmək cəhdi kimi dəyərləndirilir. Rusiya-Ukrayna müharibəsinə nəzər salsaq, Moskvanın nüvə arsenalının miqdarı onun üçün böyük üstünlük verir. Digər tərəfdən Çin elə bir inkişaf mərhələsindədir ki, ona Qərbin və ABŞ-nin təzyiq imkanları çox da yüksək deyil".
