Rusiya yanvarın 31-də axşam saatlarında Odessaya raket hücumu edib. Hücum nəticəsində mülki insanlar arasında xəsarət alanlar var.
AZƏRTAC xəbər verir ki, yanvarın 31-i axşam saatlarında Odessada güclü partlayış səsləri eşidilib. Bundan əvvəl Hərbi Hava Qüvvələri cənubdan ballistik raketlərin buraxılması təhlükəsi barədə xəbərdarlıq etmişdi.
Daha sonra Odessa vilayəti hərbi administrasiyasının rəhbəri Oleq Kiper deyib ki, Rusiya Odessanın tarixi mərkəzini raketlərlə vurublar.
Odessa meri Gennadi Truxanov isə qeyd edib ki, UNESCO-nun qorunan ərazisində dağıntı qeydə alınıb. Güclü mühafizə altında olan binaya ziyan dəyib. O bildirib ki, hücum nəticəsində iki nəfərin xəsarət aldığı məlumdur, onlar xəstəxanaya yerləşdiriliblər, vəziyyətləri orta-ağır qiymətləndirilir.
Öz növbəsində Ukrayna Prezidenti Volodimir Zelenski qeyd edib ki, ilkin məlumata görə, Rusiya ordusu mülki binalara hücum etmək üçün ballistik raketlərdən istifadə ediblər.
"Yenə təkrar edirəm, hava hücumundan müdafiə birinci prioritetdir, biz dövlətimizi daha çox müdafiə etmək üçün bütün tərəfdaşlarla işləyirik", - deyə Zelenski əlavə edib.
