Parisdə 8 Mart – Beynəlxalq Qadınlar Günü münasibətilə keçirilmiş feministlərin etiraz aksiyası zamanı polis gözyaşardıcı qazdan istifadə edib.
“Report” xarici KİV-ə istinadən xəbər verir ki, nümayiş Respublika meydanında qeyri-hökumət təşkilatları və həmkarlar ittifaqları tərəfindən təşkil edilib. Aksiyada on minlərlə insan iştirak edib.
Mitinq zamanı etirazçılar fişənglər atıblar. Nəticədə polis və nümayişçilər arasında toqquşmalar baş verib. Asayiş keşikçiləri vəziyyəti nəzarət altına almaq üçün gözyaşardıcı qaza əl atıblar.
QHT-lərin qiymətləndirməsinə görə, etiraz aksiyasına təxminən 120 min nəfər qatılıb.
Bundan əvvəl Fransanın parlamentinə "nikah borcunun" ləğvi ilə bağlı qanun layihəsi təqdim edilmişdi.
